రాష్ట్రంలో మాదక ద్రవ్యాల నిర్మూలనకు ప్రభుత్వం కఠిన చర్యలు చేపడుతోంది. ఈ క్రమంలో ముఖ్యమంత్రి ఎ. రేవంత్ రెడ్డి ఉన్నతాధికారులతో సమావేశమై, డ్రగ్స్ నిరోధక కమిటీల పనితీరును సమీక్షించారు. విద్యాసంస్థలను డ్రగ్స్ రహితంగా ఉంచేందుకు యాజమాన్యాలకు స్పష్టమైన బాధ్యతలను అప్పగించాలని ఆయన అధికారులను ఆదేశించారు.
క్యాంపస్ పరిధిలో డ్రగ్స్కు సంబంధించిన ఏ చిన్న ఘటన జరిగినా, దానికి విద్యాసంస్థల యాజమాన్యాలే పూర్తి బాధ్యత వహించాల్సి ఉంటుందని సీఎం స్పష్టం చేశారు. విద్యార్థుల ప్రవర్తనలో మార్పులను ముందే గుర్తించేందుకు ప్రతి విద్యాసంస్థలో ప్రత్యేక విభాగం ఏర్పాటు చేయాలని సూచించారు. అలాగే, క్యాంపస్ బయట జరిగే అనుమానాస్పద కార్యకలాపాలపై పోలీసులకు సమాచారం అందించే వ్యవస్థను రూపొందించాలని ఆదేశించారు.
డ్రగ్స్ సమాచారాన్ని గోప్యంగా తెలియజేసేందుకు టోల్ ఫ్రీ నెంబర్లు, క్యూఆర్ (QR) కోడ్లను అందుబాటులో ఉంచే అంశాన్ని పరిశీలించాలని సీఎం కోరారు. డ్రగ్స్ నిర్మూలనలో గుర్తించడం, మాన్పించడం, శిక్షించడం అనే మూడు దశలను సమర్థవంతంగా అమలు చేయాలని ఆయన దిశానిర్దేశం చేశారు. మొదటిసారి పట్టుబడిన వారికి కౌన్సెలింగ్, డీ-అడిక్షన్ సెంటర్ల ద్వారా చికిత్స అందించాలని, పదే పదే తప్పు చేసే వారిపై కఠిన చర్యలు తీసుకోవాలని స్పష్టం చేశారు.
ఈ మహమ్మారిని అరికట్టేందుకు అవసరమైతే కొత్త చట్టాన్ని తీసుకువచ్చే అంశంపై అధ్యయనం చేయాలని అధికారులకు ముఖ్యమంత్రి సూచించారు. డ్రగ్స్ నిరోధానికి ప్రభుత్వం అత్యంత కఠినంగా వ్యవహరిస్తుందని ఆయన పునరుద్ఘాటించారు.
