తెలంగాణలో 2026–27 విద్యా సంవత్సరానికి గాను ఎంబీబీఎస్ సీట్ల సంఖ్యను పెంచుతూ నేషనల్ మెడికల్ కమిషన్ (NMC) పరిధిలోని మెడికల్ అసెస్మెంట్ అండ్ రేటింగ్ బోర్డు (MARB) శుక్రవారం ఉత్తర్వులు జారీ చేసింది. ఈ పెంపుతో దేశంలో అత్యధిక మెడికల్ సీట్లు ఉన్న రాష్ట్రాల జాబితాలో తెలంగాణ ఐదో స్థానానికి చేరుకుంది.
రాష్ట్రంలోని 36 ప్రభుత్వ మెడికల్ కాలేజీల్లో ప్రస్తుతం 4,400 సీట్లు అందుబాటులో ఉన్నాయి. ఇందులో 4,290 సీట్లు పాతవి కాగా, కొత్తగా 110 సీట్లు పెరిగాయి. ముఖ్యంగా మహబూబ్నగర్, సిద్దిపేట కాలేజీల్లో 25 చొప్పున, నిజామాబాద్, ఆదిలాబాద్ రిమ్స్ కాలేజీల్లో 30 చొప్పున సీట్ల పెంపు జరిగింది.
ప్రైవేట్ రంగంలో ఉన్న 30 కాలేజీల్లో మొత్తం 6,050 సీట్లు ఉన్నాయి. ఇందులో 5,150 సీట్లు రెన్యువల్ కాగా, కొత్తగా ఏర్పాటైన రాజరాజేశ్వరి ఇన్స్టిట్యూట్ ఆఫ్ మెడికల్ సైన్సెస్ మహిళా కాలేజీలో 150 సీట్లు కేటాయించారు. మిగిలిన సీట్లు ఇతర ప్రైవేట్ కాలేజీల్లో పెరిగిన సామర్థ్యం ద్వారా అందుబాటులోకి వచ్చాయి.
దేశవ్యాప్తంగా ఎయిమ్స్, జిప్మర్ వంటి జాతీయ సంస్థలను మినహాయిస్తే, మొత్తం 836 కాలేజీల్లో 1,40,214 ఎంబీబీఎస్ సీట్లు ఉన్నాయి. కర్ణాటక 15,745 సీట్లతో మొదటి స్థానంలో ఉండగా, ఆ తర్వాత వరుసగా ఉత్తరప్రదేశ్, తమిళనాడు, మహారాష్ట్ర రాష్ట్రాలు ఉన్నాయి. ఆంధ్రప్రదేశ్లో 40 కాలేజీల ద్వారా 7,615 సీట్లు అందుబాటులో ఉన్నాయి.
నిర్దేశించిన సీట్ల కంటే అదనంగా అడ్మిషన్లు చేపడితే NMC చట్టం-2019 ప్రకారం కఠిన చర్యలు ఉంటాయని కమిషన్ హెచ్చరించింది. నిబంధనలు అతిక్రమిస్తే జరిమానాలతో పాటు క్రిమినల్ కేసులు కూడా నమోదు చేస్తామని స్పష్టం చేసింది. కౌన్సిలింగ్ కమిటీలు కూడా అనుమతించిన సీట్లకే పరిమితం కావాలని ఆదేశించింది.
కొత్తగా అనుమతులు పొందిన ప్రైవేట్ కాలేజీలు నోటీసు అందిన ఏడు రోజుల్లోగా MARB డైరెక్టర్ పేరిట ఎలక్ట్రానిక్ బ్యాంక్ గ్యారంటీ సమర్పించాలి. ఈ గ్యారంటీని పరిశీలించిన తర్వాతే ఆయా కాలేజీలకు లెటర్ ఆఫ్ పర్మిషన్ జారీ చేస్తామని కమిషన్ వెల్లడించింది.
