శనివారం రాత్రి వరకు అసెంబ్లీ సమావేశాలు కొనసాగుతాయని అన్ని పార్టీల ఎమ్మెల్యేలు భావించారు. ఆదివారం సెలవు, సోమవారం వినాయక చవితి పండుగ ఉండటంతో, భద్రతా ఏర్పాట్ల కోసం పోలీసులకు సమయం అవసరమని అందరూ అనుకున్నారు. ఈ నేపథ్యంలోనే రాష్ట్ర శాసనమండలి (కౌన్సిల్) సమావేశాలను శనివారం నిరవధికంగా వాయిదా వేశారు.
అయితే, అసెంబ్లీ సమావేశాన్ని మాత్రం ప్రభుత్వం అనూహ్యంగా బుధవారానికి వాయిదా వేసింది. వినాయక చవితి మరుసటి రోజు మంగళవారం ఎమ్మెల్యేలు తమ నియోజకవర్గాల నుంచి హైదరాబాద్కు తిరిగి రావాల్సి ఉంటుంది కాబట్టి, వారికి ఒక రోజు విరామం ఇవ్వాలని ముఖ్యమంత్రి రేవంత్ రెడ్డి భావించి ఉంటారని ఎమ్మెల్యేలు అభిప్రాయపడుతున్నారు.
నిషేధిత భూముల జాబితాపై రెవెన్యూ మంత్రి పొంగులేటి శ్రీనివాస్ రెడ్డి శనివారం సుదీర్ఘంగా ప్రసంగించారు. అప్పటికే రాత్రి 9 గంటలు దాటడంతో, ఆ అంశంపై సభ్యుల సందేహాలను నివృత్తి చేస్తే అర్థరాత్రి దాటుతుందని ముఖ్యమంత్రి రేవంత్ రెడ్డి మంత్రులతో చర్చించారు. సభ్యులు, పోలీసులు, అసెంబ్లీ సిబ్బంది అలసిపోతారని ఆయన ఈ నిర్ణయం తీసుకున్నారు.
అంతేకాకుండా, రాత్రి వేళల్లో ప్రసంగిస్తే ప్రజలు టీవీల ద్వారా చూడలేరని, పత్రికల్లో కూడా ముఖ్యమైన అంశాలు సరిగ్గా రాకపోవచ్చని ముఖ్యమంత్రి భావించినట్లు సమాచారం. ఈ నెల 15న మంత్రులతో సమావేశమై భూముల నిషేధిత జాబితాపై సమగ్రంగా చర్చించాలని రేవంత్ రెడ్డి నిర్ణయించారు. 16న జరిగే అసెంబ్లీ సమావేశంలో గత ప్రభుత్వం (బిఆర్ఎస్) చేసిన తప్పిదాలపై ఆయన మాట్లాడనున్నారు.
మరోవైపు, ఆరు రోజుల పాటు జరిగిన కౌన్సిల్ సమావేశాలు 19 గంటల 20 నిమిషాల పాటు సాగాయి. ఈ కాలంలో 32 ప్రసంగాలు జరగగా, నాలుగు ప్రభుత్వ బిల్లులకు సభ ఆమోదం తెలిపింది. ఈ సమావేశాల్లో ఇద్దరు బిఆర్ఎస్ ఎమ్మెల్సీలు తాతా మధు, నవీన్ రెడ్డి సస్పెండ్ అయ్యారు.
