ఈ ఏడాది మొదటి భాగంలో ఆశించిన స్థాయిలో విజయాలు లేకపోయినా, సెకండాఫ్ మొదలైనప్పటి నుంచి టాలీవుడ్ బాక్సాఫీస్ పుంజుకుంది. జూన్ 4న విడుదలైన రామ్ చరణ్ 'పెద్ది' చిత్రం దాదాపు 400 కోట్ల వసూళ్లతో ఈ జోరును మొదలుపెట్టింది. ఆ తర్వాత వచ్చిన ప్రతి సినిమా ప్రేక్షకులను ఆకట్టుకుంటూ మంచి ఫలితాలను అందుకుంటోంది.
మూడేళ్ల విరామం తర్వాత సమంత నటించిన 'మా ఇంటి బంగారం' చిత్రం బాక్సాఫీస్ వద్ద 100 కోట్ల వసూళ్లను సాధించింది. అలాగే, అఖిల్ నటించిన 'లెనిన్' చిత్రం బయ్యర్లకు 15 కోట్లకు పైగా లాభాలను అందించింది. అన్నపూర్ణ స్టూడియోస్, సితార సంయుక్తంగా నిర్మించిన ఈ సినిమా మొదటి రోజు నుంచే పాజిటివ్ టాక్తో దూసుకుపోయింది.
ప్రస్తుతం కిరణ్ అబ్బవరం నటించిన 'చెన్నై లవ్ స్టోరీ' కూడా ప్రేక్షకులను అలరిస్తోంది. ఈ సినిమా ఫస్ట్ వీకెండ్లోనే 25 కోట్ల గ్రాస్ వసూళ్లను దాటే అవకాశం ఉంది. 'సింగ్ గీతం' సినిమాకు కూడా మంచి ప్రశంసలు దక్కాయి.
ఈ సానుకూల వాతావరణం రాబోయే చిత్రాలకు కూడా కలిసి వస్తుందని మేకర్స్ భావిస్తున్నారు. జూలై 30న 'శ్రీనివాస మంగాపురం', ఆగస్ట్ 7న వరుణ్ తేజ్ 'కొరియన్ కనకరాజు', 21న రవితేజ 'ఇరుముడి', 26న యశ్ 'టాక్సిక్' సినిమాలు విడుదల కానున్నాయి. ఈ చిత్రాలు కూడా విజయం సాధిస్తే, ఈ ఏడాది సెకండాఫ్ టాలీవుడ్కు మంచి పునాదిగా నిలుస్తుంది.
