జూలై 2 నుంచి ఆగస్టు 1 వరకు స్పెయిన్లో జరిగిన అంతర్జాతీయ చెస్ టోర్నమెంట్లో కరీంనగర్కు చెందిన షౌనక్ అద్భుతమైన ఆటతీరును ప్రదర్శించారు. ఈ టోర్నీలో తన ప్రతిభతో FIDE రేటింగ్ను మెరుగుపరుచుకున్నందుకు గాను, కేంద్ర హోంశాఖ సహాయ మంత్రి బండి సంజయ్ కుమార్ ఆయనను అభినందించారు.
బుధవారం కరీంనగర్లోని ఆర్అండ్బీ అతిథి గృహంలో ఈ సత్కార కార్యక్రమం జరిగింది. షౌనక్ చిన్న వయసులోనే క్యాండిడేట్ మాస్టర్ (CM), ఫిడే మాస్టర్ (FM) వంటి అంతర్జాతీయ హోదాలను సాధించారని మంత్రి పేర్కొన్నారు. ప్రస్తుతం 2,321 FIDE రేటింగ్ను సొంతం చేసుకోవడం కరీంనగర్ జిల్లాకే గర్వకారణమని ఆయన కొనియాడారు.
ఈ విజయ ప్రయాణంలో షౌనక్కు అండగా నిలిచిన తల్లిదండ్రులు ప్రసాద్, అపూర్వలను మంత్రి ప్రశంసించారు. అలాగే, యువ ఆటగాడికి సరైన మార్గనిర్దేశం చేసిన కోచ్లు రామరాజు, అనూప్ కుమార్ల కృషిని కూడా ఆయన ప్రత్యేకంగా అభినందించారు.
ఈ కార్యక్రమంలో కరీంనగర్ మేయర్ కొలగాని శ్రీనివాస్, డిప్యూటీ మేయర్ సునీల్ రావు పాల్గొన్నారు. జీనియస్ చెస్ అకాడమీ వ్యవస్థాపకుడు కంకటి కనకయ్య, సీనియర్ కోచ్ కంకటి అనుప్ కుమార్ తదితరులు కూడా ఈ సత్కార కార్యక్రమంలో పాలుపంచుకున్నారు.
