2015 నుంచి భారత క్రికెట్ నియంత్రణ మండలి (BCCI) ఆఫ్ఘనిస్థాన్ క్రికెట్ జట్టుకు అండగా నిలుస్తోంది. తమ దేశంలో అంతర్జాతీయ మ్యాచ్లు ఆడే అవకాశం లేని అఫ్గాన్ జట్టుకు, భారత్లోని ప్రధాన స్టేడియాలను సొంత మైదానాలుగా బీసీసీఐ మార్చింది. ఈ మైత్రి వల్ల అఫ్గాన్ క్రీడాకారులు అంతర్జాతీయ స్థాయిలో ఎదిగేందుకు మార్గం సుగమమైంది.
ఉత్తరప్రదేశ్లోని గ్రేటర్ నోయిడాలో ఉన్న షహీద్ విజయ్ సింగ్ పథిక్ స్పోర్ట్స్ కాంప్లెక్స్, అఫ్గాన్ జట్టుకు భారత్లో లభించిన తొలి హోమ్ గ్రౌండ్లలో ఒకటి. 2015 నుంచి ఈ వేదికపై వారు అనేక మ్యాచ్లు ఆడారు. అలాగే ఉత్తరాఖండ్ రాజధాని డెహ్రాడూన్లోని రాజీవ్ గాంధీ అంతర్జాతీయ స్టేడియం కూడా అఫ్గాన్కు కీలక స్థావరంగా పనిచేసింది. ఇక్కడ ఒక టెస్టు, ఐదు వన్డేలు, మూడు టీ20 మ్యాచ్లు జరిగాయి.
లక్నోలోని ఏకానా స్టేడియం కూడా అఫ్గాన్ జట్టుకు హోమ్ గ్రౌండ్గా సేవలందించింది. 2019లో వెస్టిండీస్తో జరిగిన టెస్టు మ్యాచ్తో పాటు, అనేక పరిమిత ఓవర్ల సిరీస్లను ఈ మైదానం నిర్వహించింది. ఇప్పుడు ఈ జాబితాలోకి ఢిల్లీలోని అరుణ్ జైట్లీ స్టేడియం కొత్తగా చేరింది. గతంలో ఇక్కడ ఆడిన అనుభవం ఉన్నప్పటికీ, ఈసారి తమ సొంత వేదికగా భావిస్తూ అఫ్గాన్ జట్టు టీమిండియాతో తలపడనుంది.
క్రీడాకారులకు ప్రాక్టీస్ సౌకర్యాలు కల్పించడంలో బీసీసీఐ చూపిస్తున్న చొరవ పట్ల అఫ్గాన్ క్రికెట్ బోర్డు కృతజ్ఞతతో ఉంది. ఈ రెండు దేశాల బోర్డుల మధ్య ఉన్న మైత్రి క్రికెట్ ప్రపంచంలోనే అరుదైనది. సెప్టెంబర్ 13 నుంచి ప్రారంభం కానున్న సిరీస్లో ఈ క్రీడా స్నేహం మరోసారి కనిపించనుంది.
