మహిళల ఆసియాకప్-2026లో భాగంగా సెప్టెంబర్ 10న దుబాయ్ వేదికగా జరగనున్న తొలి సెమీఫైనల్ మ్యాచ్లో భారత్, బంగ్లాదేశ్ జట్లు తలపడనున్నాయి. మంగళవారం జరిగిన లీగ్ మ్యాచ్లో యూఏఈని ఓడించడం ద్వారా బంగ్లాదేశ్ ఈ కీలక దశకు చేరుకుంది.
ఈ మ్యాచ్లో టాస్ గెలిచిన యూఏఈ బౌలర్లు బంగ్లాదేశ్ బ్యాటర్లను కట్టడి చేశారు. యూఏఈ బౌలర్లు సురక్ష కొట్టె మూడు వికెట్లు, ఇందుజ నందకుమార్ రెండు వికెట్లు తీయడంతో బంగ్లాదేశ్ 55 పరుగులకే ఆరు వికెట్లు కోల్పోయి కష్టాల్లో పడింది.
ఈ క్లిష్ట సమయంలో షార్మిన్ అక్తర్ 31 బంతుల్లో 38 పరుగులు, నహిదా అక్తర్ 26 బంతుల్లో 16 పరుగులు చేసి జట్టును ఆదుకున్నారు. వీరు ఏడో వికెట్కు 42 పరుగుల భాగస్వామ్యాన్ని నెలకొల్పడంతో బంగ్లాదేశ్ నిర్ణీత 20 ఓవర్లలో 7 వికెట్ల నష్టానికి 103 పరుగులు చేసింది.
అనంతరం 104 పరుగుల లక్ష్యంతో బరిలోకి దిగిన యూఏఈ జట్టు, బంగ్లా బౌలర్ల ధాటికి నిర్ణీత ఓవర్లలో 9 వికెట్ల నష్టానికి కేవలం 69 పరుగులకే పరిమితమైంది. బంగ్లా స్పిన్నర్ రబేయా ఖాన్ మూడు వికెట్లు తీయగా, మరుఫా అక్తర్, నహిదా అక్తర్ చెరో రెండు వికెట్లు సాధించి విజయంలో కీలక పాత్ర పోషించారు.
ఈ విజయంతో బంగ్లాదేశ్ సెమీఫైనల్స్లో భారత్ను ఎదుర్కోనుంది. ఈ మ్యాచ్తో లీగ్ దశ ముగియగా, తదుపరి సెమీఫైనల్ పోరుపై ఆసక్తి నెలకొంది.
