కాంగ్రెస్ ప్రభుత్వం అధికారంలోకి వచ్చి 1000 రోజులు పూర్తయిన సందర్భంగా, ఆ పాలన వైఫల్యాలను నిరసిస్తూ ములుగు జిల్లా కేంద్రంలోని తెలంగాణ భవన్లో విద్యార్థి యువజన సదస్సు జరిగింది. ఈ కార్యక్రమానికి మాజీ మంత్రి సత్యవతి రాథోడ్ ముఖ్య అతిథిగా హాజరై ప్రసంగించారు.
ప్రస్తుత కాంగ్రెస్ ప్రభుత్వంలో మంత్రుల శాఖల్లో పెద్ద ఎత్తున అవినీతి జరుగుతోందని సత్యవతి రాథోడ్ విమర్శించారు. మేడారం మహా జాతర అభివృద్ధి పనుల విషయంలో మొదలైన మంత్రుల మధ్య వివాదాలు, కొండా సురేఖ మంత్రి పదవి కోల్పోయే వరకు కొనసాగాయని ఆమె పేర్కొన్నారు.
రేవంత్ రెడ్డి చేస్తున్న అవినీతిని ప్రశ్నించినందుకే కొండా సురేఖ తన మంత్రి పదవిని కోల్పోయారని సత్యవతి రాథోడ్ ఆరోపించారు. తనతో పాటు వరంగల్ ఉమ్మడి జిల్లాకు చెందిన మహిళా నేత సురేఖకు అన్యాయం జరిగినా, మంత్రి సీతక్క ఎందుకు స్పందించలేదని ఆమె ప్రశ్నించారు.
సురేఖ విషయంలో సీతక్క మౌనంగా ఉండటం వెనుక రేవంత్ రెడ్డి అవినీతిలో ఆమెకు కూడా వాటా ఉండవచ్చని సత్యవతి రాథోడ్ అనుమానం వ్యక్తం చేశారు. అందుకే సీతక్క రేవంత్ రెడ్డికి అండగా నిలుస్తున్నారని ఆమె ఆరోపించారు.
కాంగ్రెస్ పార్టీ ఎన్నికల సమయంలో ఇచ్చిన హామీలను యువత నిలదీయాలని సత్యవతి రాథోడ్ పిలుపునిచ్చారు. పార్టీ చేస్తున్న మోసాలను గ్రహించి, రాబోయే రోజుల్లో తగిన బుద్ధి చెప్పాలని ఆమె యువతను కోరారు.
