సీఎం రేవంత్ రెడ్డికి దమ్ముంటే వెంటనే రాజీనామా చేసి, పరకాల నుంచి తనపై పోటీకి రావాలని కొండా సుస్మిత సవాల్ విసిరారు. ఓ జాతీయ మీడియాతో మాట్లాడుతూ ఆమె ఈ వ్యాఖ్యలు చేశారు. రేవంత్ రెడ్డి అదృష్టం కొద్దీ సీఎం అయ్యారని, ఆయనలో నాయకత్వ లక్షణాలు లేవని ఆమె విమర్శించారు.
బాలలపై లైంగిక నేరాల చట్టం (POCSO) కింద కేంద్ర మంత్రి బండి సంజయ్ కుమారుడిపై వచ్చిన కేసును ఆమె ప్రస్తావించారు. ఆ సమయంలో 'కొడుకు తప్పు చేస్తే తండ్రిని అరెస్ట్ చేయాలా?' అని రేవంత్ రెడ్డి ప్రశ్నించారని ఆమె గుర్తుచేశారు. అయితే, తన తల్లి విషయంలో మాత్రం రేవంత్ రెడ్డి ఇందుకు భిన్నంగా వ్యవహరించారని ఆమె ఆగ్రహం వ్యక్తం చేశారు.
అమెరికా ప్రభుత్వంతో కొండల్ రెడ్డి రూ.3 వేల కోట్ల డీల్ కుదుర్చుకున్నారని తమకు సమాచారం ఉందని సుస్మిత పేర్కొన్నారు. పదో తరగతి చదువుతున్న తన కూతురితో కొండల్ రెడ్డి ఇంగ్లీష్లో మాట్లాడగలరా అని ఆమె సవాల్ విసిరారు.
ఇంగ్లీష్ మాట్లాడటం రాని వ్యక్తి ఏకంగా ఎయిర్ఫోర్స్ కంపెనీని ఎలా ఏర్పాటు చేస్తారని ఆమె ప్రశ్నించారు. ఈ అంశాలపై ఆమె తీవ్ర అసహనం వ్యక్తం చేస్తూ రేవంత్ రెడ్డిని లక్ష్యంగా చేసుకుని విమర్శలు గుప్పించారు.
