రాష్ట్రంలోని కోటి కుటుంబాలకు జీవిత బీమా రక్షణ కల్పించాలనే లక్ష్యంతో ప్రభుత్వం ఈ కొత్త పథకాన్ని తీసుకొస్తోంది. కుటుంబంలో సంపాదించే వ్యక్తి మరణిస్తే, ఆ కుటుంబం ఆర్థికంగా ఇబ్బందులు పడకుండా ఆదుకోవడమే ఈ పథకం ప్రధాన ఉద్దేశమని కాంగ్రెస్ నేతలు చెబుతున్నారు. ఈ పథకం కింద ఒక్కో కుటుంబానికి 5 లక్షల రూపాయల బీమా అందుతుంది.
ప్రభుత్వ నిబంధనల ప్రకారం, ఈ బీమా కుటుంబంలో ఒకరికి మాత్రమే వర్తిస్తుంది. ఒకటి కంటే ఎక్కువ మంది సంపాదించే సభ్యులు ఉన్న కుటుంబాల్లో, ఎవరికి బీమా కల్పించాలనే నిర్ణయాన్ని ఆ కుటుంబ సభ్యులే తీసుకోవాలని అధికారులు సూచించారు. బీమా మొత్తం ఎవరికి ఎంత శాతం అందాలనేది నామినీలను బట్టి నిర్ణయిస్తారు. ఈ నెల 20 నుంచి 30 వరకు గ్రామాల్లో దరఖాస్తులను స్వీకరిస్తారు.
సీఎం పర్యటనకు ముందు సిద్దిపేటలో రాజకీయ వాతావరణం వేడెక్కింది. కాంగ్రెస్ ప్రభుత్వం సిద్దిపేట అభివృద్ధిని నిర్లక్ష్యం చేస్తోందని ఆరోపిస్తూ పట్టణంలో బీఆర్ఎస్ నేతలు, స్థానిక పౌరులు పెద్ద ఎత్తున ఫ్లెక్సీలు ఏర్పాటు చేశారు. వెటర్నరీ కాలేజీని కొడంగల్కు తరలించడం, కోమటి చెరువు అభివృద్ధికి నిధులు నిలిపివేయడంపై ఈ బ్యానర్లు నిరసన వ్యక్తం చేస్తున్నాయి.
శిల్పారామం, నర్సింగ్ కళాశాల, వెయ్యి పడకల ఆసుపత్రి వంటి పనులకు నిధులు కేటాయించి అభివృద్ధిని కొనసాగించాలని ఫ్లెక్సీల ద్వారా కోరారు. సిద్దిపేట అభివృద్ధిని విస్మరించవద్దని, కుట్రలు చేయవద్దని అందులో పేర్కొన్నారు. మాజీ మంత్రి హరీశ్రావు మాట్లాడుతూ, సీఎం ఎన్నిసార్లయినా సిద్దిపేటకు రావచ్చని, అయితే అభివృద్ధి పనులను కొడంగల్కు ఎందుకు తరలించారో సభలో సమాధానం చెప్పాలని డిమాండ్ చేశారు.
మరోవైపు, బీఆర్ఎస్ హయాంలో జరిగిన అవినీతిని సిద్దిపేట సభలో సీఎం రేవంత్ రెడ్డి బయటపెడతారని కాంగ్రెస్ నేతలు చెబుతున్నారు. సీఎం సభను విజయవంతం చేసేందుకు మంత్రులు, ఎమ్మెల్యేలు ప్రజలను తరలించే పనుల్లో బిజీగా ఉన్నారు. ఈ నేపథ్యంలో సిద్దిపేటలో సీఎం పర్యటనపై రాజకీయంగా ఆసక్తి నెలకొంది.






