సైబర్ మోసాలను అరికట్టేందుకు అమెరికా ప్రభుత్వం ఇమ్మిగ్రేషన్ అండ్ నేషనాలిటీ యాక్ట్ కింద కొత్త వీసా ఆంక్షలను అమలులోకి తెచ్చింది. ఈ నిబంధనల ప్రకారం, సైబర్ నేరాల్లో భాగస్వాములైన వారితో పాటు వారి సమీప కుటుంబ సభ్యుల వీసాలను కూడా రద్దు చేస్తారు. అమెరికన్ల పొదుపు మొత్తాలను కాజేస్తున్న ఆన్లైన్ నేరగాళ్లపై ఈ కఠిన చర్యలు ఉంటాయని అమెరికా విదేశాంగ కార్యదర్శి మార్కో రూబియో స్పష్టం చేశారు.
ప్రతి ఏటా అమెరికన్లు బిలియన్ డాలర్ల మేర సైబర్ మోసాలకు గురవుతున్నారు. ముఖ్యంగా 2024లో జరిగిన సైబర్ మోసాల వల్ల 12.5 బిలియన్ డాలర్లకు పైగా నష్టం వాటిల్లిందని నివేదికలు చెబుతున్నాయి. ఈ మోసాల్లో వృద్ధులు ఎక్కువగా బాధితులుగా మారుతున్నారని అధికారులు గుర్తించారు. దీనిని దృష్టిలో ఉంచుకుని నేరస్థులపై విచారణలు చేపట్టడం, ఆస్తులను జప్తు చేయడం, ఇతర దేశాల నుంచి వారిని అప్పగించాలని కోరడం వంటి చర్యలు చేపట్టాలని ప్రభుత్వం నిర్ణయించింది.
సైబర్ నేరాలపై కఠినంగా వ్యవహరించాలని అధ్యక్షుడు డొనాల్డ్ ట్రంప్ ఇప్పటికే సంబంధిత ఏజెన్సీలకు ఆదేశాలు జారీ చేశారు. సైబర్ మోసాలకు సహకరించే లేదా ప్రోత్సహించే దేశాలు వీసా ఆంక్షలు, ఆర్థిక పరిమితులు మరియు విదేశీ సహాయంపై కోత వంటి పరిణామాలను ఎదుర్కోవాల్సి ఉంటుందని ఆయన హెచ్చరించారు. ఈ నేరాలను అరికట్టేందుకు అంతర్జాతీయ స్థాయిలో ఇతర దేశాలతో కలిసి పనిచేస్తామని అమెరికా ప్రభుత్వం పేర్కొంది.
