మానకొండూరు మండలం చెంజర్ల గ్రామానికి చెందిన పెట్టం సదయ్య, ఏకుల శ్రీనివాస్ అనే రైతులు వ్యవసాయం కోసం రూ.2 లక్షలకు పైగా రుణం తీసుకున్నారు. రాష్ట్రవ్యాప్తంగా ప్రభుత్వం రుణమాఫీ చేసినప్పటికీ, వీరికి ఆ ప్రయోజనం అందలేదు.
దీంతో తమకు కూడా రూ.2 లక్షల రుణమాఫీ వర్తింపజేయాలని కోరుతూ జూలై నెలలో జిల్లా వ్యవసాయ శాఖాధికారికి ఈ రైతులు వినతిపత్రం ఇచ్చారు. అయితే, ఈ అంశం ప్రభుత్వ పరిశీలనలో ఉందని వ్యవసాయ శాఖ లిఖితపూర్వకంగా సమాధానం ఇచ్చింది.
కొన్ని రోజులు వేచి చూసినా ఫలితం లేకపోవడంతో, జూలై 29న రైతులు హైకోర్టులో మాండమస్ రిట్ పిటిషన్ దాఖలు చేశారు. ప్రభుత్వ అధికారులు తమ విధులను సక్రమంగా నిర్వహించాలని కోరుతూ కోర్టుకు సమర్పించే దరఖాస్తును మాండమస్ రిట్ పిటిషన్ అంటారు.
ఈ పిటిషన్పై స్పందించిన హైకోర్టు, సంబంధిత రైతుల సమస్యను పరిశీలించాలని జిల్లా వ్యవసాయ శాఖను ఆదేశించింది. రెండు వారాల్లోగా ఈ విషయంపై స్పందించాలని కోర్టు స్పష్టం చేసింది.
మరోవైపు, కరీంనగర్ సర్కిల్లో విద్యుత్ మౌలిక వసతుల పనులను టీజీఎన్పీడీసీఎల్ (తెలంగాణ ఉత్తర ప్రాంత విద్యుత్ పంపిణీ సంస్థ) సీఎండీ కర్నాటి వరుణ్రెడ్డి పరిశీలించారు. ఈ నెలాఖరు లోగా పనులను పూర్తి చేయాలని అధికారులను ఆయన ఆదేశించారు.
ఇక శాతవాహన విశ్వవిద్యాలయంలో రెడ్క్రాస్ సొసైటీ సభ్యత్వ కార్యక్రమాన్ని వీసీ ఆచార్య యు.ఉమేశ్కుమార్ ప్రారంభించారు. జమ్మికుంట వ్యవసాయ మార్కెట్లో పత్తి ధర గరిష్టంగా క్వింటాల్కు రూ.9,000 పలికిందని అధికారులు తెలిపారు.
