కూకట్పల్లిలో ఉన్న 20 ఆహార సంస్థల్లో TG-SAFE అధికారులు, పోలీసులతో కలిసి తనిఖీలు చేపట్టారు. ఈ తనిఖీల్లో భాగంగా పలు హోటళ్లు, బేకరీలు, పీజీ హాస్టళ్లలో కుళ్లిపోయిన మాంసం, చికెన్, కూరగాయలను అధికారులు గుర్తించారు. అపరిశుభ్రమైన వాతావరణంతో పాటు బొద్దింకలు, ఈగలు, ఎలుకల సంచారాన్ని గమనించిన అధికారులు, ఆ కలుషిత పదార్థాలను అక్కడికక్కడే పారబోయించారు.
ఆహార భద్రత ప్రమాణాలను పాటించని ఐదు సంస్థల FSSAI లైసెన్సులను అధికారులు సస్పెండ్ చేశారు. ఫుడ్ సేఫ్టీ అండ్ స్టాండర్డ్స్ అథారిటీ ఆఫ్ ఇండియా (FSSAI) అనేది ఆహార నాణ్యతను ధృవీకరించే కేంద్ర ప్రభుత్వ సంస్థ. మణికంఠ లైవ్ స్పేస్ లగ్జరీ ఉమెన్స్ హాస్టల్, బాలాజి లగ్జరీ మెన్స్ పీజీ హాస్టల్, హోటల్ సితార గ్రాండ్, బేక్ మ్యాక్స్ ఫుడ్స్, మండి కింగ్ అరేబియన్ రెస్టారెంట్లలో లోపాలు ఉండటంతో వీటి వ్యాపార కార్యకలాపాలను తక్షణమే నిలిపివేయాలని ఆదేశించారు.
నిబంధనలు ఉల్లంఘించిన మరో ఆరు సంస్థలకు లోపాలను సరిదిద్దుకోవాలని అధికారులు ‘ఇంప్రూవ్మెంట్’ నోటీసులు జారీ చేశారు. ఇందులో మహెఫిల్ రెస్టారెంట్, కేస్ బేకర్స్, శ్రీ మహాలక్ష్మి కేంద్రం, లక్ష్మీ వెంగమాంబ హాస్టల్, పద్మావతి డీలక్స్ మెస్, శ్రీహర్ష డీలక్స్ మెస్ ఉన్నాయి. వీటితో పాటు ప్యారడైజ్ ఫుడ్కోర్ట్, చైతన్య ఫుడ్కోర్ట్, భూలక్ష్మి మెస్, గోదావరి మిఠాయి సంస్థలకు షోకాజ్ నోటీసులు ఇచ్చారు.
ఎలాంటి అనుమతులు లేకుండా నడుస్తున్న జీవీకే న్యూలగ్జరీ పీజీ మెన్స్ హాస్టల్ను అధికారులు మూసివేయించారు. రిఫ్రిజిరేటర్ల అపరిశుభ్రత, శాకాహార-మాంసాహార పదార్థాలను వేరు చేయకపోవడం వంటి ఉల్లంఘనలను గుర్తించి, నాణ్యత పరీక్షల కోసం నమూనాలను ల్యాబ్కు పంపారు. తదుపరి తనిఖీల్లో నిబంధనలు పాటించకపోతే కఠిన చర్యలు తీసుకుంటామని, జరిమానాలు విధిస్తామని అధికారులు హెచ్చరించారు.
