పంచాయతీరాజ్ శాఖలో ఏఈ (అసిస్టెంట్ ఇంజనీర్)గా పనిచేస్తున్న తెల్లపూడి నాగరాజు (60), ఆయన భార్య మీనా (58), కుమార్తె సౌజన్య (32), మనుమడు కార్తికేయ రెడ్డి ఆదివారం రాత్రి 12 గంటల సమయంలో రాజమహేంద్రవరం రైల్ కం రోడ్డు బ్రిడ్జి పైనుంచి గోదావరిలోకి దూకారు. జాలర్లు వెంటనే స్పందించి బాలుడు కార్తికేయ రెడ్డిని కాపాడగా, మిగిలిన ముగ్గురు నదిలో కొట్టుకుపోయారు. సోమవారం సాయంత్రం దోభీ ఘాట్ వద్ద నాగరాజు మృతదేహం లభ్యమైందని పోలీసులు తెలిపారు.
షేక్ సాధిక్ ఖాన్ అనే వ్యక్తి వేధింపుల వల్లే తాము ఈ నిర్ణయం తీసుకున్నామని నాగరాజు రాసిన మరణ వాంగ్మూలం (చనిపోయే ముందు రాసిన లేఖ) పోలీసులకు దొరికింది. కాకినాడలో రైఫిల్ షూటింగ్ అకాడమీ నడుపుతున్న సాధిక్ ఖాన్, తన కుమార్తె సౌజన్యను బెదిరించి ఆమె బ్యాంకు ఖాతాలు, ఏటీఎం కార్డులను బలవంతంగా తీసుకున్నాడని నాగరాజు లేఖలో పేర్కొన్నారు. తనను, తన మనుమడిని చంపుతానని సాధిక్ ఖాన్ బెదిరిస్తున్నాడని ఆయన ఆరోపించారు.
ఈ ఏడాది ఫిబ్రవరిలో సౌజన్య భర్త జగదీశ్వరరావు మరణించినప్పటి నుంచి సాధిక్ ఖాన్ తమ కుటుంబ వ్యవహారాల్లో జోక్యం చేసుకుంటున్నాడని నాగరాజు లేఖలో వివరించారు. పదిహేనేళ్లుగా గౌరవంగా బతుకుతున్న తమను సాధిక్ ఖాన్ మోసం చేశాడని ఆయన ఆవేదన వ్యక్తం చేశారు. ఈ ఘటనపై డిప్యూటీ సీఎం పవన్ కళ్యాణ్ ఆరా తీశారు.
ప్రస్తుతం సౌత్ జోన్ డీఎస్పీ ఎ.శివప్రియ నేతృత్వంలో పోలీసులు సాధిక్ ఖాన్ కోసం గాలిస్తున్నారు. ఘటన జరిగిన సమయంలో కారు నడిపిన డ్రైవర్ ఆచూకీని కూడా పోలీసులు సేకరిస్తున్నారు. గల్లంతైన మీనా, సౌజన్య కోసం నదిలో గాలింపు చర్యలు కొనసాగుతున్నాయి.
