సంతమాగులూరు ఎస్ఐ నాగమల్లేశ్వరరావు, బల్లికురవ ఎస్ఐ నాగరాజు ప్రయాణిస్తున్న కారు శంఖవరప్పాడు వద్ద రోడ్డు ప్రమాదానికి గురైంది. ఈ ఘటనలో నలుగురికి తీవ్ర గాయాలు కాగా, ఎస్ఐలు వెంటనే 108 అత్యవసర వైద్య సేవల వాహనానికి ఫోన్ చేసి క్షతగాత్రులను ఆసుపత్రికి తరలించారు. ఆ తర్వాత కారును అక్కడే వదిలి వారు వెళ్లిపోయారు.
ప్రమాద స్థలానికి చేరుకున్న అద్దంకి ఎస్ఐ సాయి కారును స్వాధీనం చేసుకునే క్రమంలో స్థానికులు వాహనాన్ని పరిశీలించారు. అందులో మద్యం బాటిళ్లు, పోలీసు యూనిఫాంలు, గంజాయి ప్యాకెట్లు, నగదు ఉండవచ్చని అనుమానిస్తున్న ఒక నీలిరంగు బ్యాగు కనిపించాయి. ఈ దృశ్యాలను సెల్ఫోన్లలో చిత్రీకరిస్తున్న యువకులను అద్దంకి సీఐ సుబ్బారాజు వారించడంతో పోలీసులకు, గ్రామస్థులకు మధ్య వాగ్వివాదం జరిగింది.
ఈ ప్రమాదంపై అద్దంకి వైఎస్సార్సీపీ ఇన్చార్జి డాక్టర్ అశోక్ కుమార్ చింతలపూడి తీవ్ర విమర్శలు చేశారు. బల్లికురవలో జరిగిన ఒక పార్టీలో పాల్గొని తిరిగి వస్తుండగా పోలీసులు మద్యం మత్తులో కారు నడిపారని, గ్రానైట్ వ్యాపారులతో అక్రమ ఒప్పందాల కోసమే వారు సమావేశమయ్యారని ఆయన ఆరోపించారు. కారులో గంజాయి దొరకడంపై ముఖ్యమంత్రి చంద్రబాబు నాయుడు సమాధానం చెప్పాలని, బాధ్యులైన అధికారులపై చర్యలు తీసుకోవాలని ఆయన డిమాండ్ చేశారు.
మరోవైపు, కారులో లభించిన గంజాయి ఒక పాత కేసుకు సంబంధించిందని పోలీసులు వివరిస్తున్నారు. ప్రమాదానికి గురైన వాహనాలను పోలీసులు స్టేషన్కు తరలించారు. ఈ ఘటనలో కారు నడిపిన పోలీసులకు రక్తపరీక్షలు ఎందుకు చేయలేదని రాజకీయ నాయకులు ప్రశ్నిస్తున్నారు.
