ఏలూరులో జన్మించిన వళ్లూరి బాలకృష్ణ 12 ఏళ్ల వయసులోనే నటనను మొదలుపెట్టారు. ఐదవ తరగతి వరకు చదువుకున్న ఆయన, 1937లో సినిమాల్లో నటించాలనే లక్ష్యంతో ఎవరికీ చెప్పకుండా రైలు ఎక్కి కలకత్తా వెళ్లారు. అక్కడ ఆకలితో ఇబ్బంది పడుతూనే, ఈస్ట్ ఇండియా కంపెనీ స్టూడియోలో చిన్న వేషాల కోసం ప్రయత్నాలు చేశారు.
కలకత్తాలో ఉన్నప్పుడు 'విజయదశమి' లేదా 'కీచకవధ' చిత్రంలో నటించి 15 రూపాయల పారితోషికం అందుకున్నారు. ఆ తర్వాత మద్రాసు చేరుకుని నాటకాల్లో నటించారు. విజయా సంస్థ నిర్మించిన 'పాతాళభైరవి' సినిమా ఆయన కెరీర్ను మలుపు తిప్పింది. ఇందులో ఎన్టీఆర్ స్నేహితుడు అంజిగాడిగా, అలాగే చెట్టు మీద ఉండే భూతం పాత్రలో ఆయన నటన ప్రేక్షకులను బాగా అలరించింది.
బాలకృష్ణకు మిమిక్రీ, వివిధ ప్రాంతాల మాండలికాలపై మంచి పట్టు ఉండేది. 'మిస్సమ్మ', 'మాయాబజార్' వంటి చిత్రాల్లో ఆయన చేసిన పాత్రలు ఇప్పటికీ గుర్తుండిపోతాయి. ముఖ్యంగా 'మిస్సమ్మ'లో అక్కినేని డిటెక్టివ్ రాజు అసిస్టెంట్గా డైలాగ్ లేకుండానే ఆయన చేసిన నటన ప్రత్యేకంగా నిలిచింది. విఠలాచార్య, భావనారాయణ సినిమాల్లో ఆయనకు తప్పకుండా అవకాశం ఉండేది.
అయితే, పద్మనాభం, రాజబాబు వంటి నటుల పోటీ పెరగడంతో బాలకృష్ణకు అవకాశాలు తగ్గాయి. దీంతో ఆయన మద్యానికి బానిసయ్యారు. ఒకసారి షూటింగ్కు తాగి రావడంతో దర్శకుడు వేషం ఇవ్వలేదు, కానీ ఎన్టీఆర్ జోక్యం చేసుకుని 'నిప్పులాంటి మనిషి' చిత్రంలో ఆయనకు అవకాశం కల్పించారు.
శోభన్ బాబు నటించిన 'బలిదానం' బాలకృష్ణ చివరి చిత్రం. డబ్బింగ్ చెప్పకముందే 1982 నవంబర్ 6న ఆయన అనారోగ్యంతో కన్నుమూశారు. భార్య, ఏడుగురు కుమార్తెలను విడిచి వెళ్లిన ఆయన అంత్యక్రియలను పద్మనాభం, పోతురాజు నిర్వహించారు.
