ప్రత్యేక ఓటర్ల జాబితా సవరణ (SIR) ప్రక్రియలో బూత్ లెవల్ ఏజెంట్ల (BLA) బాధ్యత ఎంతో కీలకమని రాష్ట్ర ఉప ముఖ్యమంత్రి మల్లు భట్టి విక్రమార్క స్పష్టం చేశారు. శనివారం రాత్రి ఖమ్మం జిల్లా బోనకల్ మండలం జానకీపురంలో జరిగిన సమావేశంలో ఆయన పాల్గొన్నారు. ప్రజాస్వామ్య వ్యవస్థను బలోపేతం చేయడంలో, ఓటు హక్కును కాపాడటంలో ఏజెంట్లు చేస్తున్న కృషిని ఆయన అభినందించారు.
ఓటర్ల జాబితా నుంచి మరణించిన వారిని, ఇతర ప్రాంతాలకు వలస వెళ్లిన వారిని తొలగించేటప్పుడు అత్యంత అప్రమత్తంగా ఉండాలని భట్టి విక్రమార్క ఆదేశించారు. ఈ వివరాలన్నింటినీ ప్రత్యేక నోట్బుక్లలో పక్కాగా నమోదు చేయాలని సూచించారు. అలాగే, ప్రభుత్వ పాఠశాలలను క్రమం తప్పకుండా సందర్శించి, విద్యార్థులకు అందిస్తున్న అల్పాహారం నాణ్యతను పరిశీలించాలని, ఆ వివరాలను సామాజిక మాధ్యమాల్లో పంచుకోవాలని కోరారు.
ప్రభుత్వం అమలు చేస్తున్న 200 యూనిట్ల ఉచిత విద్యుత్, మహిళలకు ఉచిత బస్సు ప్రయాణం, రూ.10 లక్షల రాజీవ్ ఆరోగ్యశ్రీ, రైతు భరోసా, ఇందిరమ్మ ఇళ్ల పథకాల ప్రయోజనాలను ప్రతి ఇంటికి వివరించాలని ఏజెంట్లకు సూచించారు. ప్రజలకు అందిన లబ్ధిని స్పష్టమైన లెక్కలతో వివరించడం ద్వారా ప్రభుత్వ పథకాలపై అవగాహన కల్పించాలని ఆయన కోరారు.
రాష్ట్రంలోని ప్రతి కుటుంబానికి త్వరలో రూ.5 లక్షల వరకు ఉచిత ఆరోగ్య బీమా అందించేందుకు ప్రభుత్వం ప్రణాళికలు సిద్ధం చేస్తోందని భట్టి విక్రమార్క వెల్లడించారు. ఈ పథకం అమల్లోకి వచ్చిన తర్వాత నమోదు ప్రక్రియలో ప్రజలకు సహాయం చేయాలని ఆయన కోరారు. స్థానికంగా ఇందిరమ్మ కమిటీల్లో మహిళలకు మద్దతు ఇవ్వాలని, వాట్సాప్ బృందాల ద్వారా ప్రభుత్వ సమాచారాన్ని ప్రజలకు చేరవేయాలని ఆయన స్పష్టం చేశారు.
