పెద్దపల్లి జిల్లా ఓదెల మండలంలోని రూపు నారాయణపేట గ్రామ శివారులో ఉన్న మానేరు చెక్ డ్యాంలో శుక్రవారం ఈతకు వెళ్లిన ఇద్దరు విద్యార్థులలో ఒకరు మృతి చెందారు. పోత్కపల్లి హైస్కూల్లో పదో తరగతి చదువుతున్న ఆదిత్య, యశ్వంత్ ఈత కోసం చెక్ డ్యాం వద్దకు వెళ్లారు.
నీటిలో ఈత కొడుతుండగా ఆదిత్య ప్రమాదవశాత్తు చెక్ డ్యాంలోని గుంతలో పడిపోయాడు. ఈ ఘటనలో ఆదిత్య మృతి చెందగా, యశ్వంత్ సురక్షితంగా బయటపడ్డాడు. స్థానికుల సమాచారం మేరకు ఈ విషయాన్ని అధికారులు గుర్తించారు.
విద్యార్థి మరణంతో ఆదిత్య కుటుంబ సభ్యులు తీవ్ర విషాదంలో మునిగిపోయారు. ఈ ఘటనపై సమాచారం అందుకున్న గ్రామస్తులు పెద్ద సంఖ్యలో ఘటనా స్థలానికి చేరుకుని పరిస్థితిని పరిశీలిస్తున్నారు.
