ముఖ్యమంత్రి చంద్రబాబు నాయుడు నేడు ఉదయం 11 గంటలకు తన క్యాంపు కార్యాలయంలో ఉద్యోగ సంఘాల ప్రతినిధులతో జాయింట్ స్టాఫ్ కౌన్సిల్ సమావేశం నిర్వహించనున్నారు. ప్రభుత్వ ఉద్యోగుల పెండింగ్ సమస్యలను పరిష్కరించే ఉద్దేశంతో ప్రభుత్వం ఈ భేటీకి ప్రత్యేక ప్రాధాన్యత ఇచ్చింది. మొత్తం 11 ఉద్యోగ సంఘాల నాయకులు ఈ చర్చల్లో పాల్గొననున్నారు.
ఈ సమావేశంలో పీఆర్సీ (వేతన సవరణ కమిషన్) కమిషన్ ఏర్పాటు, ఐఆర్ (మధ్యంతర భృతి) ప్రకటన, డీఏ (కరువు భత్యం), సరెండర్ లీవ్ బకాయిలు, రిటైర్డ్ ఉద్యోగుల చెల్లింపుల గురించి ప్రధానంగా చర్చించనున్నారు. ఆర్థిక అంశాలతో పాటు ఉద్యోగుల ఇతర సమస్యలపైనా ప్రభుత్వం దృష్టి సారించింది. ఇప్పటికే మంత్రుల ఉపసంఘం ఉద్యోగ సంఘాలతో జరిపిన చర్చల నివేదికను సీఎంకు అందజేసింది.
తమ డిమాండ్లపై స్పష్టమైన నిర్ణయం తీసుకోవాలని ఉద్యోగ సంఘాలు కోరుతున్నాయి. తెలంగాణతో పోలిస్తే ఏపీ ఉద్యోగుల వేతనాలు 25 శాతం తక్కువగా ఉన్నాయని ఏపీజేఏసీ అమరావతి అధ్యక్షుడు బొప్పరాజు పేర్కొన్నారు. తమ బిల్లులు కూడా పెండింగ్లో ఉన్నాయని, ఒకవేళ ఈ సమావేశంలో స్పష్టత రాకపోతే ఆందోళనలను కొనసాగిస్తామని ఆయన స్పష్టం చేశారు.
మరోవైపు, తమ ఆర్థిక డిమాండ్లపై ప్రభుత్వం నుంచి నిర్ణయం ఆశిస్తున్నామని ఏపీఎన్జీఓ సంఘం అధ్యక్షుడు సాగర్ తెలిపారు. ఒకవేళ ప్రభుత్వం సానుకూలంగా స్పందించకపోతే, తదుపరి ఉద్యమ కార్యాచరణను ప్రకటిస్తామని ఆయన హెచ్చరించారు. గత కొన్ని రోజులుగా ఉద్యోగ సంఘాలు జిల్లా స్థాయిలో వివిధ రూపాల్లో నిరసనలు తెలుపుతున్న నేపథ్యంలో, నేటి సమావేశం కీలకంగా మారింది.
ఈ భేటీలో పీఆర్సీ కమిషన్ నియామకంపై సీఎం చంద్రబాబు కీలక నిర్ణయం తీసుకునే అవకాశం ఉందని తెలుస్తోంది. ఆర్థిక డిమాండ్ల పరిష్కారంపై ప్రభుత్వం ఇచ్చే హామీల ఆధారంగా ఉద్యోగ సంఘాలు తమ తదుపరి నిర్ణయాలను వెల్లడించనున్నాయి.
