సీఎం రేవంత్ రెడ్డి ప్రాతినిధ్యం వహిస్తున్న కొడంగల్ నియోజకవర్గంలో తిరుపతిరెడ్డిని 'షాడో ఎమ్మెల్యే'గా స్థానికులు పిలుచుకుంటారు. అయితే, తాజాగా సీఎం చేపట్టిన రెండు రోజుల పర్యటనలో తిరుపతిరెడ్డి కనిపించకపోవడం రాజకీయ వర్గాల్లో ఆసక్తి రేపుతోంది. సోదరుల మధ్య విభేదాలు తారాస్థాయికి చేరాయని స్థానికంగా గుసగుసలు వినిపిస్తున్నాయి.
హకీంపేటలో నిర్మిస్తున్న మల్టీపర్పస్ ఇండస్ట్రియల్ పార్కులో భారీ అవినీతి జరిగిందని తిరుపతిరెడ్డి వర్గం ఆరోపిస్తోంది. ఈ ప్రాజెక్టు విషయంలో సీఎం రేవంత్కు మరో షాడోగా ఎదిగిన నాయకుడిని ప్రభుత్వం వెనకేసుకొస్తుండటం తిరుపతిరెడ్డికి నచ్చడం లేదని సమాచారం. నియోజకవర్గంలో తిరుపతిరెడ్డి పట్టును తగ్గించేందుకు కొంతకాలంగా ప్రయత్నాలు జరుగుతున్నాయని ఆయన వర్గీయులు భావిస్తున్నారు.
మరోవైపు, సీఎం పర్యటన సందర్భంగా నారాయణపేట జిల్లా మద్దూర్లో సామాన్యులు ఇబ్బందులు పడ్డారు. అభివృద్ధి జరుగుతుందని ఆశించిన వ్యాపారులు, సీఎం పర్యటన కోసం తమ దుకాణాలను మూసివేయించడంతో అసహనం వ్యక్తం చేశారు. వినతిపత్రాలు ఇచ్చేందుకు ఎదురుచూసిన వారికి కూడా నిరాశే మిగిలింది.
సీఎం పర్యటన నేపథ్యంలో పోలీసులు పలువురు బీఆర్ఎస్ నాయకులను ముందుస్తుగా అదుపులోకి తీసుకున్నారు. తెల్లవారుజామునే మద్దూర్, కొత్తపల్లి మండలాల్లోని నేతల ఇళ్లకు వెళ్లి వారిని అరెస్ట్ చేసి స్టేషన్కు తరలించారు. దుద్యాల మండలంలోని హకీంపేట ఎడ్యుకేషన్ హబ్ పనులను సీఎం పరిశీలించి అధికారులతో సమీక్ష నిర్వహించారు.
ఇక రాయదుర్గ్ వక్ఫ్ భూముల పరిరక్షణ జేఏసీ కన్వీనర్ అబ్దుల్ వాహబ్, సీఎం పర్యటన సందర్భంగా తనను హౌస్ అరెస్ట్ చేయడాన్ని ఖండించారు. ప్రజా వ్యతిరేక విధానాలను ప్రశ్నించే వారి గొంతును ప్రభుత్వం అణచివేస్తోందని ఆయన ఆరోపించారు. కోర్టు కేసులను పక్కనపెట్టి టీజీఐఐసీ (తెలంగాణ రాష్ట్ర పారిశ్రామిక మౌలిక సదుపాయాల సంస్థ) ద్వారా భూముల వేలం వేయడం సరికాదని, అరెస్ట్ చేసిన నాయకులను వెంటనే విడుదల చేయాలని ఆయన డిమాండ్ చేశారు.
