నంద్యాల జిల్లా నందికొట్కూరు మండలం శాతనకోట వద్ద గత శనివారం జరిగిన బొలెరో ప్రమాదంలో 15 మంది కూలీలు తీవ్రంగా గాయపడ్డారు. పొలం పనులకు వెళ్తుండగా వాహనం అదుపుతప్పి బోల్తా పడటంతో ఈ ఘటన చోటుచేసుకుంది. ప్రస్తుతం ఐదుగురు బాధితులు శస్త్రచికిత్సలు చేయించుకోగా, మరో పది మంది కర్నూలు ప్రభుత్వ సర్వజనాసుపత్రిలో చికిత్స పొందుతున్నారు.
ప్రమాదంలో గాయపడిన కూలీలు తమకు పరిహారం అందించాలని డిమాండ్ చేస్తూ, గాయాలకు కట్టిన కట్లతోనే యజమాని ఇంటిని ముట్టడించారు. రోజువారీ కూలీలుగా పనిచేసే తాము, గాయాల కారణంగా పనికి వెళ్లలేక కుటుంబ పోషణ భారంగా మారిందని బాధితులు ఆవేదన వ్యక్తం చేశారు. ప్రమాదం జరిగి ఆరు రోజులు గడుస్తున్నా, యజమాని తమను పరామర్శించలేదని వారు ఆరోపించారు.
యజమాని అనారోగ్యంతో ప్రైవేటు ఆసుపత్రిలో ఉన్నానని మెడికల్ సర్టిఫికెట్ చూపించి పోలీసుల చర్యల నుంచి తప్పించుకుంటున్నారని బాధితులు పేర్కొన్నారు. తమకు న్యాయం జరిగే వరకు యజమాని ఇంటి వద్ద నుంచి కదిలేది లేదని వారు స్పష్టం చేశారు. తమను ఆదుకోవాలని కలెక్టర్, ఎస్పీలను బాధితులు వేడుకుంటున్నారు.
ఈ ఘటనపై స్పందించిన స్థానికులు, పేద కుటుంబాలకు చెందిన ఈ కూలీలను ప్రభుత్వం వెంటనే ఆదుకోవాలని కోరుతున్నారు. బాధితులకు తగిన పరిహారం ఇప్పించాలని వారు డిమాండ్ చేస్తున్నారు.
