ముఖ్యమంత్రి రేవంత్ రెడ్డి లోక్భవన్కు వెళ్లి గవర్నర్ శివప్రతాప్ శుక్లాను కలిశారు. ఈ భేటీలో కొండా సురేఖను మంత్రివర్గం నుంచి తొలగించాలన్న సిఫార్సు లేఖను గవర్నర్కు అందజేశారు. ముఖ్యమంత్రి సమక్షంలోనే గవర్నర్ ఆ ఫైలుపై సంతకం చేయడంతో ఆమె బర్తరఫ్ ప్రక్రియ అధికారికంగా పూర్తయింది.
కొండా సురేఖ దేవాదాయ, అటవీ, పర్యావరణ శాఖల మంత్రిగా బాధ్యతలు నిర్వర్తించారు. ఆమె తొలగింపుతో ఖాళీ అయిన ఈ శాఖలను ముఖ్యమంత్రి రేవంత్ రెడ్డి తన వద్దే ఉంచుకుంటారా లేదా మరొక సీనియర్ మంత్రికి అదనపు బాధ్యతలుగా అప్పగిస్తారా అనేది త్వరలో తెలియనుంది. ఇకపై కొండా సురేఖ కేవలం ఎమ్మెల్యేగా మాత్రమే కొనసాగుతారని గవర్నర్ కార్యాలయం స్పష్టం చేసింది.
ఈ నిర్ణయంపై కొండా సురేఖ కుమార్తె సుస్మితా తీవ్రంగా స్పందించారు. ఆరుసార్లు ఎమ్మెల్యేగా గెలిచిన తన తల్లిని అవమానించారని, బీసీలను లక్ష్యంగా చేసుకునే ఈ నిర్ణయం తీసుకున్నారని ఆమె ఆరోపించారు. ఒకరి వ్యాఖ్యలకు మరొకరిని బాధ్యులను చేయడం సరికాదని, ఈ వ్యవహారంపై రాజకీయంగా సమాధానం చెబుతామని ఆమె పేర్కొన్నారు.
మరోవైపు, తాను ఎలాంటి తప్పు చేయలేదని కొండా సురేఖ మీడియా సమావేశంలో ఆవేదన వ్యక్తం చేశారు. మంత్రి పదవి నుంచి తొలగించినప్పటికీ, తాను కాంగ్రెస్ పార్టీకి రాజీనామా చేయడం లేదని ఆమె స్పష్టం చేశారు. ఎమ్మెల్యేగా కొనసాగుతూనే తన తదుపరి రాజకీయ ప్రయాణంపై నిర్ణయం తీసుకుంటానని ఆమె ప్రకటించారు.
గత కొంతకాలంగా కొండా సురేఖ చేసిన వ్యాఖ్యలు, దేవాదాయ శాఖ పరిధిలోని పరిణామాలు పార్టీ అధిష్టానానికి ఆగ్రహం తెప్పించాయి. రాహుల్ గాంధీకి ఫిర్యాదులు అందడం, మీడియా ముందు ఆమె చేసిన ఘాటు వ్యాఖ్యల నేపథ్యంలో ప్రభుత్వం ఈ కఠిన నిర్ణయం తీసుకుంది. ఈ పరిణామం రాష్ట్ర రాజకీయాల్లో, ముఖ్యంగా వరంగల్ జిల్లాలో చర్చనీయాంశంగా మారింది.
