తనకు లంచం ఇచ్చే సాహసం ఎవరూ చేయలేరని, ఒకవేళ ఎవరైనా అలాంటి ఆలోచన చేస్తే వందసార్లు ఆలోచించుకోవాలని ఐఏఎస్ అధికారి తుకారం ముండే హెచ్చరించారు. ఆహార పదార్థాల నాణ్యతను పర్యవేక్షించే మహారాష్ట్ర ఫుడ్ అండ్ డ్రగ్ అడ్మినిస్ట్రేషన్ (FDA) కమిషనర్గా ఆయన ఈ వ్యాఖ్యలు చేశారు.
ఆహార కల్తీకి వ్యతిరేకంగా తుకారం ముండే నేతృత్వంలో అధికారులు చేపడుతున్న మెరుపు దాడులు రాష్ట్రవ్యాప్తంగా చర్చనీయాంశంగా మారాయి. ఈ చర్యల వల్ల సామాన్య ప్రజల నుంచి ప్రశంసలు వస్తున్నప్పటికీ, నిబంధనలు పాటించక లైసెన్స్లు కోల్పోయిన వ్యాపారుల నుంచి ఆయన వ్యతిరేకతను ఎదుర్కొంటున్నారు.
తాను కఠినంగా వ్యవహరించడం వల్ల కొందరు తనను అహంభావి అని విమర్శిస్తుంటారని ఆయన పేర్కొన్నారు. అయితే, తాను ఎలాంటి గొప్ప విప్లవాలు చేయడం లేదని, కేవలం తన విధిని మాత్రమే సక్రమంగా నిర్వర్తిస్తున్నానని ఆయన స్పష్టం చేశారు.
తాను చేస్తున్న పనుల పట్ల నిజాయితీగా, పారదర్శకంగా ఉండటమే తన ధ్యేయమని ముండే తెలిపారు. తన బాధ్యతను పూర్తి చేసే క్రమంలో ఫలితం దక్కితే సంతోషమని, లేదంటే కనీసం ప్రయత్నించానన్న తృప్తి తనకు ఉంటుందని ఆయన వివరించారు.
