చిత్తూరు జిల్లా కుప్పం మండలం అడవి బూదుగూరు గ్రామంలో ఆదివారం ఉదయం గ్రామస్తులు వలస దేవర పూజలు చేపట్టారు. వర్షాభావ పరిస్థితులు తొలగి, చెరువులు, కుంటలు నిండాలని, పంటలు బాగా పండాలని కోరుకుంటూ గ్రామ పెద్దల ఆధ్వర్యంలో ఈ సంప్రదాయ కార్యక్రమాన్ని నిర్వహించారు.
గ్రామాన్ని ఖాళీ చేసి సమీప అడవికి వెళ్లిన మహిళలు, పురుషులు, యువకులు వరుణ దేవుడిని ప్రసన్నం చేసుకునేందుకు ప్రత్యేక ప్రార్థనలు చేశారు. తరతరాలుగా వస్తున్న ఈ ఆచారాన్ని ప్రతి ఏటా వర్షాలు లేని సమయంలో పాటించడం తమ గ్రామస్తులకు అలవాటు అని గ్రామ పెద్దలు తెలిపారు.
పూజలు కొనసాగుతుండగానే ఆకాశంలో మేఘాలు దట్టంగా కమ్ముకున్నాయి. ఉరుములు, మెరుపులతో కూడిన వర్షం ఒక్కసారిగా కురవడంతో గ్రామస్తులు ఆనందోత్సాహాలతో కేరింతలు కొట్టారు. దేవుని కరుణ వల్లే వర్షం కురిసిందని, తమ పూజలు ఫలించాయని వారు విశ్వాసం వ్యక్తం చేశారు.
ప్రకృతి అనుగ్రహంతోనే వర్షాలు పడతాయని గ్రామస్తులు నమ్ముతున్నారు. ఈ పూజల ద్వారా భవిష్యత్తులో కూడా మంచి వర్షాలు కురుస్తాయని వారు ఆశాభావం వ్యక్తం చేశారు.
