కుప్పం నియోజకవర్గంలోని శాంతిపురం మండలం కడపల్లి గ్రామంలోని పోలింగ్ కేంద్రాల్లో టీడీపీకి చెందిన వ్యక్తులు బలవంతంగా చొరబడ్డారు. వీరు పోలింగ్ బూత్‌లలోకి ప్రవేశించి రిగ్గింగ్‌కు పాల్పడ్డారని వైఎస్సార్‌సీపీ వర్గాలు తెలిపాయి. ఈ ఘటనలు టీడీపీ అధినేత చంద్రబాబు నివాసం వద్దే జరగడం గమనార్హం.
ఈ అక్రమాలను అడ్డుకునేందుకు ప్రయత్నించిన వైఎస్సార్‌సీపీ పోలింగ్ ఏజెంట్లపై టీడీపీ శ్రేణులు దాడి చేసి, వారిని బయటకు పంపించాయి. అంతేకాకుండా, వైఎస్సార్‌సీపీకి చెందిన ఎంపీటీసీ అభ్యర్థిని ఓటు వేయకుండా అడ్డుకుని, బలవంతంగా వెనక్కి పంపారు.
ఎన్నికల్లో అక్రమాలు ఇక్కడితో ఆగలేదు. కుప్పం మున్సిపాలిటీకి చెందిన ఓటర్లను కడపల్లి గ్రామంలో అక్రమంగా ఓటు వేయించినట్లు గుర్తించారు. ఓటు వేయడానికి వచ్చిన సాధారణ ఓటర్లను సైతం బెదిరించి పోలింగ్ కేంద్రాల నుంచి బయటకు పంపించారని సమాచారం.
ఈ అరాచకాలను నిరసిస్తూ వైఎస్సార్‌సీపీ కార్యకర్తలు, బాధిత ఓటర్లు కడపల్లి ప్రధాన రహదారిపై బైఠాయించి ధర్నా నిర్వహించారు. పోలీసుల సమక్షంలోనే అధికార పార్టీ నాయకులు ప్రజాస్వామ్య విలువలని దెబ్బతీస్తున్నారని వారు మండిపడ్డారు. చంద్రబాబు సొంత నియోజకవర్గంలోనే ఇలాంటి ఘటనలు జరగడం శాంతిభద్రతల వైఫల్యానికి నిదర్శనమని వారు ఆరోపించారు.
ఈ ఉద్రిక్త పరిస్థితుల నేపథ్యంలో కుప్పం ప్రాంతంలో భారీగా పోలీసులను మోహరించారు.
