వంటగదిలో వెలువడే పొగ, నూనె, గ్రీజు కారణంగా స్విచ్బోర్డులు త్వరగా నల్లగా మారి జిడ్డు పడతాయి. అయితే ఎలక్ట్రికల్ పరికరాలు కావడంతో వీటిని నీటితో కడగడం ప్రమాదకరం. కాబట్టి, శుభ్రం చేసే ముందు మెయిన్ స్విచ్ లేదా ఎంసీబీ (MCB)ని పూర్తిగా ఆపివేయాలి. రక్షణ కోసం చేతులకు పొడి గ్లౌజులు, కాళ్లకు రబ్బరు బూట్లు ధరించడం మంచిది. బోర్డుపై నేరుగా నీటిని చల్లకూడదు, కేవలం బాగా పిండిన తడి గుడ్డను మాత్రమే వాడాలి.
బేకింగ్ సోడాను నీటితో కలిపి చిక్కటి పేస్ట్లా చేసి బోర్డుపై పూసి 5 నిమిషాలు ఉంచాలి. ఆ తర్వాత పొడి స్క్రబ్బర్ లేదా బ్రష్తో రుద్ది, పొడి గుడ్డతో తుడిస్తే జిడ్డు వదిలి బోర్డు మెరుస్తుంది. అలాగే ఉప్పులో నిమ్మరసం కలిపి లేదా తెల్లటి టూత్పేస్ట్ను పూసి 5 నిమిషాల తర్వాత బ్రష్తో శుభ్రం చేసినా మంచి ఫలితం ఉంటుంది.
రబ్బింగ్ ఆల్కహాల్ (ఐసోప్రొపైల్ ఆల్కహాల్) ఎలక్ట్రానిక్ పరికరాలకు అత్యంత సురక్షితం. ఇది త్వరగా ఆవిరైపోతుంది కాబట్టి షార్ట్ సర్క్యూట్ అయ్యే అవకాశం ఉండదు. దూది లేదా మైక్రోఫైబర్ గుడ్డకు కొద్దిగా ఆల్కహాల్ అద్ది తుడిస్తే మొండి మరకలు సులభంగా పోతాయి. ఇది అందుబాటులో లేకపోతే గోరువెచ్చని నీటిలో డిష్ సోప్, ఒక టీస్పూన్ తెల్ల వెనిగర్ కలిపి వాడవచ్చు. మూలల్లో ఉన్న జిడ్డును తొలగించడానికి పాత టూత్బ్రష్ ఉపయోగించవచ్చు.
శుభ్రపరచడం పూర్తయిన తర్వాత స్విచ్బోర్డు, దాని చుట్టుపక్కల ప్రాంతం పూర్తిగా పొడిగా ఉండేలా చూసుకోవాలి. పొడి గుడ్డతో చివరిసారిగా తుడిచి, తడి ఏమాత్రం లేదని నిర్ధారించుకున్న తర్వాత మాత్రమే మెయిన్ విద్యుత్ సరఫరాను తిరిగి ఆన్ చేయాలి.
