బీఆర్ఎస్ పార్టీ నుంచి గెలిచిన దానం నాగేందర్, ఆ తర్వాత కాంగ్రెస్ పార్టీలో చేరారు. అంతేకాకుండా, కాంగ్రెస్ పార్టీ అభ్యర్థిగా సికింద్రాబాద్ లోక్సభ నియోజకవర్గం నుంచి పోటీ చేసి ఓడిపోయారు. ఒక పార్టీ గుర్తుపై గెలిచిన ఎమ్మెల్యే, రాజీనామా చేయకుండానే మరో పార్టీ తరపున ఎన్నికల్లో పోటీ చేయడం ఫిరాయింపునకు బలమైన ఆధారమని హైకోర్టు భావించింది. ఈ కారణంతోనే ఆయన శాసనసభ సభ్యత్వాన్ని రద్దు చేస్తూ కోర్టు తీర్పు ఇచ్చింది.
ఈ పరిణామంతో పార్టీ మారిన మిగిలిన తొమ్మిది మంది ఎమ్మెల్యేల్లో ఆందోళన మొదలైంది. గతంలో వీరందరి అనర్హత పిటిషన్లను స్పీకర్ కొట్టివేశారు. వీరు పార్టీ మారినట్లుగా ఎటువంటి ఆధారాలు లేవని స్పీకర్ అప్పట్లో పేర్కొన్నారు. దానం నాగేందర్ విషయంలో ఉన్నట్లుగా, మిగిలిన వారిపై ఎటువంటి నిర్దిష్టమైన ఆధారాలు లేవని రాజకీయ వర్గాల్లో చర్చ జరుగుతోంది.
మిగిలిన తొమ్మిది మంది ఎమ్మెల్యేలలో కడియం శ్రీహరి విషయంలో మాత్రం కొంత ఇబ్బంది ఉండవచ్చని భావిస్తున్నారు. తన కుమార్తె కాంగ్రెస్ ఎంపీ అభ్యర్థిగా పోటీ చేసినప్పుడు, కడియం శ్రీహరి ఆమె తరపున ఎన్నికల ప్రచారం చేశారని బీఆర్ఎస్ పార్టీ స్పీకర్ వద్ద వాదించింది. ఈ వాదనలను మళ్లీ కోర్టు ముందు ఉంచే అవకాశం ఉందని సమాచారం.
దానం నాగేందర్ కేసులో జరిగినట్లుగానే, మిగిలిన వారి విషయంలో కూడా కోర్టు మెట్లు ఎక్కితే పరిస్థితి ఎలా ఉంటుందనే దానిపై చర్చలు నడుస్తున్నాయి. పార్టీ మారిన మిగిలిన ఎమ్మెల్యేల విషయంలో న్యాయపరంగా కాంగ్రెస్ పార్టీ ముందున్న సవాళ్లు ఏమిటనే దానిపై సమాధానాల కోసం వెతుకుతున్నారు. ఏది ఏమైనా, ఈ తీర్పుతో పార్టీ మారిన ఎమ్మెల్యేల వర్గాల్లో టెన్షన్ కనిపిస్తోందని వారి సన్నిహిత వర్గాలు చెబుతున్నాయి.
