బిఆర్ఎస్ వర్కింగ్ ప్రెసిడెంట్ కెటిఆర్ పుట్టిన రోజు సందర్భంగా పిసిసి అధ్యక్షుడు, ఎమ్మెల్సీ బి. మహేష్ కుమార్ గౌడ్ శుభాకాంక్షలు తెలిపారు. అయితే, ఇదే సమయంలో ఆయన కెటిఆర్ తీరుపై తీవ్రస్థాయిలో విమర్శలు చేశారు. శుక్రవారం పిసిసి వర్కింగ్ ప్రెసిడెంట్ జగ్గారెడ్డితో కలిసి నిర్వహించిన విలేకరుల సమావేశంలో ఆయన ఈ వ్యాఖ్యలు చేశారు.
కెటిఆర్ తన పుట్టిన రోజున కూడా నిజాలు మాట్లాడకుండా అబద్ధాలే చెప్పారని మహేష్ కుమార్ గౌడ్ ఆరోపించారు. బిఆర్ఎస్ అధికారంలో ఉన్నప్పుడు గ్లోబరిన్ సంస్థ వల్ల ఇంటర్మీడియట్ విద్యార్థులు చనిపోయారని ఆయన గుర్తు చేశారు. అటువంటి పార్టీకి చెందిన కెటిఆర్, ధర్నా చౌక్ వద్దకు వెళ్లి విద్యార్థులతో కలిసి నిరసన తెలపడం విడ్డూరమని ఆయన విమర్శించారు.
ధర్నా చౌక్ను గతంలో బిఆర్ఎస్ ప్రభుత్వం ఎత్తివేసిందని, ప్రజాస్వామ్యబద్ధంగా నిరసన తెలిపే హక్కును తాము తిరిగి కల్పించామని మహేష్ కుమార్ గౌడ్ పేర్కొన్నారు. కెటిఆర్ ధర్నా చౌక్ వేదికపైకి వెళ్లే ముందు, విద్యార్థులకు, వారి తల్లిదండ్రులకు ముక్కు నేలకు రాసి క్షమాపణలు చెప్పి ఉండాల్సిందని ఆయన అన్నారు.
ఎనబై ఏళ్ల వయసులో మల్లికార్జున ఖర్గే విద్యార్థుల కోసం పోరాడుతుంటే, కెసిఆర్ మాత్రం ఫామ్ హౌస్కే పరిమితమయ్యారని మహేష్ కుమార్ గౌడ్ విమర్శించారు. కెటిఆర్ తన వ్యాఖ్యలతో ప్రజలను తప్పుదోవ పట్టిస్తున్నారని ఆయన మండిపడ్డారు.
