కారు ఇంజిన్ మన్నికకు, పనితీరుకు ఇంజిన్ ఆయిల్ చాలా ముఖ్యం. ఇది ఇంజిన్ భాగాలకు కందెనలా పనిచేస్తూ, వేడిని తగ్గించి, ఘర్షణ నుండి రక్షణ కల్పిస్తుంది. సాధారణంగా ప్రతి 5,000 నుండి 10,000 కిలోమీటర్లకు ఒకసారి లేదా ఏడాదికి ఒకసారి ఆయిల్ మార్చాలని నిపుణులు సిఫార్సు చేస్తారు. అయితే డ్రైవింగ్ చేసే విధానం, పరిస్థితులను బట్టి ఈ సమయం మారవచ్చు.
ఆయిల్ పరిస్థితిని తనిఖీ చేయడానికి కారును సమతలంగా ఉన్న చోట పార్క్ చేసి, ఇంజిన్ చల్లారే వరకు వేచి ఉండాలి. బోనెట్ తెరిచి, ఇంజిన్ ఆయిల్ స్థాయిని కొలిచే డిప్స్టిక్ (Dipstick) అనే పరికరాన్ని బయటకు తీసి శుభ్రం చేయాలి. దానిని తిరిగి లోపల పెట్టి తీస్తే, ఆయిల్ స్థాయి 'min', 'max' మార్కుల మధ్య ఉండాలి.
ఆయిల్ రంగును బట్టి దాని నాణ్యతను గుర్తించవచ్చు. ఆయిల్ అంబర్ లేదా లేత గోధుమ రంగులో ఉంటే అది మంచి స్థితిలో ఉన్నట్లు అర్థం. ఒకవేళ ఆయిల్ నలుపు రంగులో ఉన్నా, పాలలా కనిపిస్తున్నా లేదా లోహపు రేణువులు కనిపిస్తున్నా అది పాడైపోయినట్లు గుర్తించాలి. కాలిపోయిన వాసన వస్తున్నా సరే, ఆయిల్ మార్చాల్సిన సమయం వచ్చిందని అర్థం చేసుకోవాలి.
ఆయిల్ మార్చాలనుకుంటే కొత్త ఆయిల్, కొత్త ఆయిల్ ఫిల్టర్, రెంచ్, డ్రెయిన్ పాన్, జాక్ వంటి పరికరాలు సిద్ధం చేసుకోవాలి. జాక్తో కారును పైకి లేపి, ఇంజిన్ను కొద్దిగా వేడి చేసి పాత ఆయిల్ను డ్రెయిన్ ప్లగ్ ద్వారా బయటకు తీయాలి. పాత ఫిల్టర్ను తీసి కొత్తది అమర్చి, కొత్త ఆయిల్ను పోయాలి.
చివరగా ఇంజిన్ను స్టార్ట్ చేసి ఎక్కడైనా లీక్లు ఉన్నాయేమో తనిఖీ చేయాలి. కొన్ని కిలోమీటర్లు ప్రయాణించిన తర్వాత ఆయిల్ స్థాయిని మరోసారి సరిచూసుకోవాలి. పాత నూనె పర్యావరణానికి హానికరం కాబట్టి దానిని సరైన పద్ధతిలో పారవేయాలి. మీకు అనుభవం లేకపోతే మెకానిక్తో చేయించడం ఉత్తమం.
