బెంగళూరులో జరిగిన ఒక కేసులో కర్నాటక హైకోర్టు శుక్రవారం కీలక తీర్పు ఇచ్చింది. ఇద్దరు వ్యక్తుల మధ్య ఇష్టపూర్వకంగా జరిగిన శారీరక సంబంధం, ఆ తర్వాత బ్రేకప్ లేదా పెళ్లికి నిరాకరించడం వల్ల నేరంగా మారదని కోర్టు తేల్చి చెప్పింది.
ఈ కేసులో ఒక యువతి, యువకుడు కాలేజీ రోజుల్లో రెండేళ్ల పాటు ప్రేమలో ఉన్నారు. పెళ్లి చేసుకుంటానని నమ్మించి మోసం చేశాడని యువతి పోలీసులకు ఫిర్యాదు చేయడంతో, యువకుడిపై అత్యాచారం కేసు నమోదైంది.
అయితే, ఈ కేసులో ఇరువర్గాలు రాజీ పడటానికి సిద్ధమైనప్పటికీ, అత్యాచారం వంటి తీవ్రమైన నేరాల్లో కేవలం రాజీ కుదిరిందనే కారణంతో కేసును కొట్టివేయలేమని హైకోర్టు పేర్కొంది. దీంతో కోర్టు ఈ కేసులోని వాస్తవాలను సమగ్రంగా పరిశీలించింది.
సుదీర్ఘకాలం కొనసాగిన ఇష్టపూర్వక సంబంధం పెళ్లి వరకు వెళ్లకపోతే, దానిని అత్యాచారం అనలేమని కోర్టు అభిప్రాయపడింది. యువకుడు మొదట్నుంచే మోసం చేయాలనే ఉద్దేశంతో తప్పుడు హామీ ఇచ్చాడని చెప్పడానికి ఎటువంటి ఆధారాలు లేవని కోర్టు గుర్తించింది.
ఇలాంటి కేసుల్లో మోసానికి సంబంధించి బలమైన ఆధారాలు ఉండాలని కోర్టు స్పష్టం చేసింది. ఈ నేపథ్యంలో, ఆ యువకుడిపై నమోదైన అత్యాచార కేసును హైకోర్టు కొట్టివేసింది.
