శంషాబాద్ విమానాశ్రయం వద్ద మీడియాతో మాట్లాడిన కేంద్ర మంత్రి బండి సంజయ్, రాష్ట్ర ప్రభుత్వ తీరుపై విమర్శలు గుప్పించారు. కేవలం మాటలకే పరిమితం కాకుండా, 21 నుండి 30 ఏళ్ల మధ్య వయస్సున్న 'జెన్-జీ' (Gen-Z) యువతకు మంత్రి పదవులు అప్పగించాలని సీఎం రేవంత్ రెడ్డిని కోరారు. ముఖ్యంగా ఖాళీగా ఉన్న హోమ్, విద్యా, మున్సిపల్ శాఖలను యువతకు కేటాయించాలని ఆయన డిమాండ్ చేశారు.
ప్రస్తుతం ఉన్న కొందరు ఎమ్మెల్సీలతో రాజీనామా చేయించి, ఆ స్థానాలను యువతకు ఇవ్వాలని బండి సంజయ్ సూచించారు. కాంగ్రెస్ పార్టీలో జెన్-జీ అంటే విహెచ్, కేకే, కోదండరెడ్డి వంటి వయోభారం ఉన్నవారేనా అని ఆయన ఎద్దేవా చేశారు. వయస్సు మళ్లిన వారికి యూత్ కోటాలో పదవులు కట్టబెట్టడం కాంగ్రెస్ సంస్కృతిలో భాగమని ఆయన ఆరోపించారు.
భారతీయ జనతా పార్టీ 'దేశం ఫస్ట్, పార్టీ నెక్స్ట్, పర్సన్ లాస్ట్' అనే సిద్ధాంతాన్ని పాటిస్తుందని, కేంద్ర మంత్రి ధర్మేంద్ర ప్రధాన్ రాజీనామా దీనికి నిదర్శనమని సంజయ్ గుర్తుచేశారు. యువతకు ప్రాధాన్యత ఇస్తున్నామని చెబుతున్న కాంగ్రెస్ ప్రభుత్వం, నిజంగా యువ శక్తిపై నమ్మకం ఉంటే పాలనలో వారికి తగిన ప్రాతినిధ్యం కల్పించాలని ఆయన స్పష్టం చేశారు.
