నీట్ పేపర్ లీక్ వ్యవహారంపై కాక్రోచ్ జనతా పార్టీ (సీజేపీ) ఆధ్వర్యంలో జరిగిన నిరసనలకు సంబంధించిన రీల్స్ సోషల్ మీడియాలో విస్తృతంగా వ్యాపిస్తున్నాయి. ఈ జెన్ జెడ్ (Gen Z) రీల్స్పై నటి, బీజేపీ ఎంపీ కంగనా రనౌత్ తన ఇన్స్టాగ్రామ్ స్టోరీ ద్వారా తీవ్ర అసహనం వ్యక్తం చేశారు.
ఈ వీడియోలను చూస్తుంటే తనకు వాంతి వచ్చేలా ఉందని, నిరసనకారుల భాష, ప్రవర్తన తనను ఎంతో బాధించాయని కంగనా పేర్కొన్నారు. తన జీవితంలో ఇంతటి వివాదాస్పదమైన, అసభ్యకరమైన విషయాలను ఎప్పుడూ చూడలేదని ఆమె వ్యాఖ్యానించారు. వీరిని ఎలా పెంచారోనని తల్లిదండ్రులను ఉద్దేశించి ఆమె ప్రశ్నించారు.
భారతదేశం గొప్ప సంస్కృతి, సంప్రదాయాలకు ప్రతీక అని, అలాంటి దేశంలో ఇలాంటి ప్రవర్తన దేశ విలువలకు విరుద్ధమని ఆమె విమర్శించారు. కాక్రోచ్ అని పేరు పెట్టుకున్న నిరసనకారులు, తాము ఎంచుకున్న పేరుకు తగ్గట్టుగానే ప్రవర్తిస్తున్నారని ఆమె మండిపడ్డారు. వీరు ప్రపంచానికి కేవలం చెత్తను, అసహ్యాన్ని మాత్రమే చూపిస్తున్నారని ఆమె ఆరోపించారు.
ఈ రీల్స్ తనను ఎంతగానో బాధించాయని, వీటిని చూశాక కొంతకాలం సోషల్ మీడియాకు దూరంగా ఉండటమే మంచిదని తనకు అనిపించిందని కంగనా తెలిపారు. ప్రస్తుతం ఆమె చేసిన ఈ వ్యాఖ్యలు సోషల్ మీడియాలో చర్చనీయాంశంగా మారాయి.
