సంగారెడ్డి జిల్లా జహీరాబాద్ నియోజకవర్గంలో బీఆర్ఎస్ ఎమ్మెల్యే మాణిక్ రావు తన సొంత పార్టీ నేతల పెత్తనం వల్ల ఇబ్బందులు పడుతున్నారు. 2018, 2023 ఎన్నికల్లో వరుసగా గెలిచినప్పటికీ, నియోజకవర్గ వ్యవహారాల్లో పార్టీ సీనియర్ నాయకులు జోక్యం చేసుకుంటున్నారని ఆయన ఆవేదన చెందుతున్నారు. దీనివల్ల తాను ఎమ్మెల్యేగా గెలిచి ఉపయోగం ఏంటని ఆయన లోలోపల మధనపడుతున్నట్లు సమాచారం.
గతంలో ఫరీదుద్దీన్ ఎమ్మెల్సీగా ఉన్న సమయంలో ఆయన షాడో ఎమ్మెల్యేగా వ్యవహరించేవారని, ఆయన మరణం తర్వాత కూడా ఇదే పరిస్థితి కొనసాగుతోందని పార్టీ వర్గాల్లో చర్చ జరుగుతోంది. ప్రస్తుతం డీసీఎంఎస్ మాజీ చైర్మన్ శివకుమార్ నియోజకవర్గంలో షాడో ఎమ్మెల్యేగా చక్రం తిప్పుతున్నారని ప్రచారం ఉంది. ప్రజలు ఎమ్మెల్యే మాణిక్ రావు దగ్గరికి వెళ్లే కంటే, శివకుమార్ ద్వారా పనులు చేయించుకోవడానికే మొగ్గు చూపుతున్నారని స్థానికులు చెబుతున్నారు.
ఇటీవల కేంద్ర మంత్రి అశ్విని వైష్ణవ్ను కలిసేందుకు ఢిల్లీ వెళ్లిన బృందంలో ఎమ్మెల్యేతో పాటు శివకుమార్ కూడా ఉండటం మాణిక్ రావును మరింత అసహనానికి గురిచేసింది. తన నియోజకవర్గంలో ఇతరుల జోక్యం పెరగడంపై ఆయన తీవ్ర అసంతృప్తితో ఉన్నారు. పార్టీ కేడర్ కూడా మాణిక్ రావు పరిస్థితిని చూసి పగవాడికి కూడా ఇలాంటి కష్టం రాకూడదని వ్యాఖ్యానిస్తున్నారు.
ప్రస్తుతం కాంగ్రెస్ ప్రభుత్వం ఉండటంతో కొంతవరకు పని చేయగలుగుతున్నానని, ఒకవేళ బీఆర్ఎస్ అధికారంలో ఉంటే తన పరిస్థితి ఇంకా దారుణంగా ఉండేదని మాణిక్ రావు తన సన్నిహితులతో అన్నట్లు సమాచారం. ఈ నీడ నుంచి బయటపడి నియోజకవర్గంలో పూర్తిస్థాయిలో స్వేచ్ఛగా పనిచేయాలని ఆయన ప్రయత్నిస్తున్నారు. ఆయనకు ఆ అవకాశం దక్కుతుందో లేదో వేచి చూడాలి.
