ఎన్నికల్లో ఓటమి ఎదురైన ప్రతిసారీ ఎలక్ట్రానిక్ ఓటింగ్ యంత్రాలను (EVM) మరియు ఓటర్ల జాబితా తయారీ ప్రక్రియను (SIR) కాంగ్రెస్ పార్టీ తప్పుపడుతోందని అమిత్ షా విమర్శించారు. ఈవీఎంలు సరిగ్గా పనిచేయకపోతే, తెలంగాణలో రేవంత్ రెడ్డి ముఖ్యమంత్రిగా ఎలా ఎన్నికయ్యారని ఆయన రాహుల్ గాంధీని ప్రశ్నించారు. ఈ అంశాలపై చర్చించేందుకు ప్రత్యేక పార్లమెంట్ సమావేశాలు నిర్వహించేందుకు కూడా తాము సిద్ధమని ఆయన సవాల్ విసిరారు.
రాహుల్ గాంధీ తరచుగా విదేశాలకు వెళ్తుంటారని, అలా చేసేవారు ప్రజాక్షేత్రంలో గెలవలేరని అమిత్ షా ఎద్దేవా చేశారు. రాజ్యాంగ పుస్తకాన్ని పట్టుకుని తిరగడం కంటే, పార్లమెంట్‌లో ప్రజా సమస్యలపై మాట్లాడాలని ఆయన సూచించారు. కాంగ్రెస్ వ్యాఖ్యలు 'ఆడలేక మద్దెల ఓడు' అన్న చందంగా ఉన్నాయని ఆయన వ్యాఖ్యానించారు.
దేశవ్యాప్తంగా నకిలీ ఓట్లను, మరణించిన వారి ఓట్లను తొలగిస్తుంటే రాహుల్ గాంధీకి కడుపుమంటగా ఉందని అమిత్ షా ఆరోపించారు. చొరబాటుదారులను తమ ఓటు బ్యాంకుగా మార్చుకోవాలని కాంగ్రెస్ ప్రయత్నిస్తోందని ఆయన విమర్శించారు. రాబోయే రోజుల్లో తెలంగాణలో బీజేపీ అధికారంలోకి వస్తుందని ఆయన ధీమా వ్యక్తం చేశారు.
కాంగ్రెస్ హయాంలో రూ.12 లక్షల కోట్ల కుంభకోణాలు జరిగాయని, కానీ ప్రధాని నరేంద్ర మోదీ పాలనలో ఎలాంటి అవినీతి ఆరోపణలు లేవని ఆయన చెప్పారు. మోదీకి ఉన్న ప్రజాదరణ ముందు రాహుల్ గాంధీ ఏమాత్రం సరితూగరని అమిత్ షా స్పష్టం చేశారు.
