కేంద్ర హోం మంత్రి అమిత్ షా ఈ నెల 26న రాష్ట్రానికి రానున్నారు. కరీంనగర్లోని ప్రతిమా విద్యా సంస్థ సిల్వర్ జూబ్లీ ఉత్సవాల్లో పాల్గొనడం ఈ పర్యటన ప్రధాన ఉద్దేశం. ప్రైవేటు కార్యక్రమం కోసం వస్తున్నప్పటికీ, ఈ పర్యటన నేపథ్యంలో బిజెపి రాష్ట్ర నాయకత్వం అప్రమత్తమైంది.
బిజెపి రాష్ట్ర అధ్యక్షుడు ఎన్. రాంచందర్ రావు పార్టీ వ్యవహారాలపై పూర్తిస్థాయి నివేదికను సిద్ధం చేస్తున్నారు. రాష్ట్రంలోని తాజా రాజకీయ పరిస్థితులు, పార్టీ కార్యకలాపాల పురోగతిపై అమిత్ షా అడిగే ప్రశ్నలకు సమాధానాలు ఇచ్చేలా ఈ నివేదికను రూపొందిస్తున్నారు. దీనిని ఆయన అమిత్ షాకు అందజేయనున్నారు.
అమిత్ షా పర్యటన షెడ్యూల్ ప్రకారం, మధ్యాహ్నం 12.45 గంటలకు చెన్నై నుంచి బయలుదేరి 1.30 గంటలకు శంషాబాద్ విమానాశ్రయానికి చేరుకుంటారు. అక్కడి నుంచి బిఎస్ఎఫ్ హెలికాప్టర్లో కరీంనగర్ వెళ్తారు. కార్యక్రమం ముగించుకుని తిరిగి 3.45 గంటలకు హెలికాప్టర్లో శంషాబాద్ చేరుకుంటారు.
తిరుగు ప్రయాణానికి ముందు శంషాబాద్ విమానాశ్రయం లాంజ్లో బిజెపి రాష్ట్ర ముఖ్య నాయకులతో అమిత్ షా సమావేశం కానున్నారు. అనంతరం ప్రత్యేక విమానంలో ఆయన ఢిల్లీకి బయలుదేరి వెళ్తారని పార్టీ వర్గాలు వెల్లడించాయి.
