అధికార కేంద్రం చుట్టూ తిరుగుతూ పైరవీలు, కమీషన్ల దందాలు చేసే వ్యక్తులు, ఇప్పుడు మహిళలను వేధించే స్థాయికి దిగజారారని ఆరోపణలు వస్తున్నాయి. ప్రభుత్వ సాయం కోసం వచ్చే మహిళా పారిశ్రామికవేత్తలను, సామాన్యులను వీరు లక్ష్యంగా చేసుకుంటున్నారని తెలుస్తోంది. ఇటీవల అవుట్డోర్ అడ్వర్టైజింగ్ రంగంలో వ్యాపార అనుమతుల కోసం ప్రయత్నిస్తున్న ఒక మహిళా పారిశ్రామికవేత్తకు చేదు అనుభవం ఎదురైంది.
తన సమస్యపై మాట్లాడేందుకు ముఖ్యనేత అనుచరుడిని ఆమె సంప్రదించగా, సచివాలయానికి రావడానికి బదులుగా ప్రైవేటు గెస్ట్హౌస్కు రావాలని సదరు వ్యక్తి కోరారు. ఈ ఘటనతో పాటు 72వ మిస్ వరల్డ్ పోటీల సమయంలో కూడా అధికార పార్టీ నేతలు అనుచితంగా ప్రవర్తించారని ఆరోపణలు ఉన్నాయి. ఒక అధికారిక విందులో విదేశీ పోటీదారుతో అధికార వర్గాలు అసభ్యంగా ప్రవర్తించడంతో, ఆమె పోటీ నుంచి అర్ధాంతరంగా వైదొలిగారని ప్రచారం జరిగింది.
ప్రభుత్వ యంత్రాంగం నిబంధనల ప్రకారం కాకుండా, షాడో సీఎంవోగా చలామణి అవుతున్న కొందరు వ్యక్తుల కనుసన్నల్లో నడుస్తోందని విమర్శలు వస్తున్నాయి. 2012లో ఉమ్మడి ఆంధ్రప్రదేశ్ రాజకీయాల్లో సృష్టించిన తారాచౌదరి ఉదంతం తరహాలోనే, ఇప్పుడు కూడా పలువురు నేతల చుట్టూ వివాదాలు ముసురుకుంటున్నాయి. అధికారం ముసుగులో విచ్చలవిడిగా ప్రవర్తిస్తున్న వ్యక్తులను కట్టడి చేయకపోతే, పాలకులపై ప్రజల్లో ఉన్న నమ్మకం సన్నగిల్లే ప్రమాదం ఉందని పరిశీలకులు హెచ్చరిస్తున్నారు.
మహిళా ఆత్మగౌరవానికి భంగం కలగకుండా ప్రభుత్వం తక్షణమే చర్యలు తీసుకోవాలని వారు కోరుతున్నారు.
