హైదరాబాద్లోని సనత్నగర్లో ఉన్న డాక్టర్ మర్రి చెన్నారెడ్డి తెలంగాణ ఇనిస్టిట్యూట్ ఆఫ్ మెడికల్ సైన్సెస్ (TIMS)ను సందర్శించాలని బీఆర్ఎస్ పార్టీ నిర్ణయించింది. ఈ మేరకు బుధవారం అక్కడికి వెళ్లేందుకు ప్రయత్నించిన ఎమ్మెల్యేలు టీ హరీశ్రావు, తలసాని శ్రీనివాస్ యాదవ్, పీ సబితా ఇంద్రారెడ్డి, డీ సుధీర్రెడ్డి, వీ శ్రీనివాస్గౌడ్లను పోలీసులు గృహనిర్బంధంలో ఉంచారు.
హరీశ్రావు తన ఇంటి నుంచి బయటకు రాకుండా పోలీసులు వాహనాన్ని అడ్డుకున్నారు. ఈ సమయంలో ఆయన నివాసం వద్ద పార్టీ కార్యకర్తలు పెద్ద సంఖ్యలో చేరుకోవడంతో అక్కడ కొంతసేపు ఉద్రిక్తత నెలకొంది. తమను అడ్డుకునేందుకు పోలీసులను రంగంలోకి దించడం సిగ్గుచేటని ఎమ్మెల్యే సుధీర్రెడ్డి విమర్శించారు.
ముఖ్యమంత్రి ఎ రేవంత్రెడ్డి ఇటీవల చేసిన వ్యాఖ్యలకు కౌంటర్గా తాము అక్కడికి వెళ్తున్నామని తలసాని శ్రీనివాస్ యాదవ్ తెలిపారు. ప్రభుత్వం తన వైఫల్యాలను కప్పిపుచ్చుకోవడానికే మమ్మల్ని గృహనిర్బంధం చేసిందని ఆయన ఆరోపించారు. ఆసుపత్రిలో పూర్తిస్థాయి మౌలిక సదుపాయాలు కల్పించకుండానే హడావుడిగా ప్రారంభించారని ఆయన పేర్కొన్నారు.
గతంలో కేసీఆర్ ప్రభుత్వం ఆరోగ్య రంగానికి ప్రాధాన్యతనిస్తూ 34 ప్రభుత్వ వైద్య కళాశాలలను ఏర్పాటు చేసిందని బీఆర్ఎస్ నేతలు గుర్తుచేశారు. కేసీఆర్ ముందుచూపుతో నాలుగు TIMS ఆసుపత్రుల నిర్మాణానికి శ్రీకారం చుట్టారని, రానున్న కాలంలో 10,000 పడకలను అందుబాటులోకి తీసుకురావాలని లక్ష్యంగా పెట్టుకున్నారని వారు వివరించారు. అయితే, గత మూడు సంవత్సరాలుగా ఈ పనులు నత్తనడకన సాగుతున్నాయని వారు ఆరోపించారు.
కేసీఆర్కు మంచి పేరు వస్తుందనే భయంతోనే ప్రస్తుత ప్రభుత్వం చౌకబారు రాజకీయాలకు పాల్పడుతోందని నేతలు విమర్శించారు. ప్రతి ఆరు నెలలకోసారి ఆసుపత్రిని ప్రారంభిస్తామని చెబుతున్నా, వైద్య సేవలు మాత్రం అందుబాటులోకి రావడం లేదని వారు ఆరోపించారు. TIMS ఆసుపత్రులలో పూర్తిస్థాయి మౌలిక సదుపాయాలు కల్పించి, సమగ్ర వైద్య సేవలను అందుబాటులో ఉంచాలని బీఆర్ఎస్ డిమాండ్ చేస్తోంది.
