ఏలూరులోని సత్రంపాడు హైస్కూల్లో శుక్రవారం మహిళా భద్రత, విద్యార్థుల క్రమశిక్షణపై ప్రత్యేక అవగాహన సదస్సు జరిగింది. ఈ కార్యక్రమంలో మహిళా పోలీస్ స్టేషన్ ఇన్స్పెక్టర్ ఎం. సుబ్బారావు, త్రీటౌన్ ఇన్స్పెక్టర్ కోటేశ్వరరావు, మహిళా ఎస్ఐ నాగమణి మరియు శక్తి టీమ్ సభ్యులు పాల్గొన్నారు.
పాఠశాలకు వచ్చే, వెళ్లే సమయంలో బాలికలకు వేధింపులు ఎదురుకాకుండా పోలీసులు తీసుకుంటున్న భద్రతా చర్యలను అధికారులు వివరించారు. మహిళలు, బాలికల రక్షణ కోసం పనిచేస్తున్న శక్తి టీమ్ సేవలను, అత్యవసర సమయాల్లో వారిని ఎలా సంప్రదించాలో విద్యార్థులకు, తల్లిదండ్రులకు తెలియజేశారు.
మొబైల్ ఫోన్లు, సోషల్ మీడియాను బాధ్యతాయుతంగా వాడాలని విద్యార్థులకు సూచించారు. పిల్లల ఆన్లైన్ కార్యకలాపాలపై తల్లిదండ్రులు నిరంతరం పర్యవేక్షణ ఉంచాలని, సైబర్ మోసాలు, ఆన్లైన్ వేధింపుల పట్ల అప్రమత్తంగా ఉండాలని కోరారు. అత్యవసర పరిస్థితుల్లో 112, మహిళా హెల్ప్లైన్ 181, సైబర్ క్రైమ్ హెల్ప్లైన్ 1930 నంబర్లను సంప్రదించాలని సూచించారు.
పిల్లల ప్రవర్తనలో వచ్చే మార్పులను గమనిస్తూ వారితో స్నేహపూర్వకంగా ఉండాలని తల్లిదండ్రులకు సూచించారు. విద్యార్థుల భవిష్యత్తు కోసం ఉపాధ్యాయులు, తల్లిదండ్రుల మధ్య సమన్వయం ఎంతో అవసరమని అధికారులు పేర్కొన్నారు. ఈ కార్యక్రమం ద్వారా పోలీసు శాఖ, ప్రజల మధ్య సత్సంబంధాలు మరింత మెరుగుపడతాయని వారు ఆశాభావం వ్యక్తం చేశారు.
