సీఎం రేవంత్ రెడ్డి అధ్యక్షతన జరిగిన మంత్రివర్గ సమావేశంలో ఈ సదస్సు నిర్వహణకు ప్రత్యేక కమిటీలను ఏర్పాటు చేయాలని నిర్ణయించారు. డిప్యూటీ సీఎం భట్టి విక్రమార్క, మంత్రులు శ్రీధర్ బాబు, ఉత్తమ్ కుమార్ రెడ్డి, వివేక్ వెంకటస్వామి నేతృత్వంలోని సబ్ కమిటీ ఈ కార్యక్రమాలను పర్యవేక్షిస్తుంది. ఈ సదస్సు ద్వారా రాష్ట్రంలోని డిఫెన్స్, ఏరో స్పేస్, ఫార్మా రంగాల్లో ఉన్న పెట్టుబడి అవకాశాలను ప్రపంచానికి పరిచయం చేయాలని ప్రభుత్వం లక్ష్యంగా పెట్టుకుంది.
రాష్ట్రంలో ఏడు రకాల సన్న ధాన్యం సాగును ప్రోత్సహించాలని కేబినెట్ నిర్ణయించింది. ఈ పంటలు పండించే రైతులకు క్వింటాలుకు రూ. 500 బోనస్ అందించనున్నారు. యాసంగి సీజన్లో రాష్ట్రం 81.16 లక్షల మెట్రిక్ టన్నుల ధాన్యాన్ని కనీస మద్దతు ధరతో సేకరించి దేశంలోనే మొదటి స్థానంలో నిలిచింది. కేంద్రం సేకరించని మిగిలిన 17.54 లక్షల మెట్రిక్ టన్నుల ధాన్యాన్ని వేలం ద్వారా విక్రయించేందుకు కూడా మంత్రివర్గం ఆమోదం తెలిపింది.
సాంకేతిక విద్యాశాఖ పరిధిలో ఉన్న ఐటీఐలు, ఏటిసిలు, పాలిటెక్నిక్ కళాశాలలను యంగ్ ఇండియా స్కిల్స్ యూనివర్సిటీ పరిధిలోకి తీసుకురానున్నారు. వీటిని పరిశ్రమల శాఖ నుంచి శక్తి శాఖ పరిధిలోకి మారుస్తూ కేబినెట్ తీర్మానించింది. అలాగే, రాష్ట్రవ్యాప్తంగా 113 నియోజకవర్గాల్లో నిర్మించనున్న యంగ్ ఇండియా ఇంటిగ్రేటెడ్ రెసిడెన్షియల్ స్కూల్ కాంప్లెక్స్లలో భాగంగా, తాజాగా మరో ఏడు పాఠశాలలకు ప్రభుత్వం అనుమతులు మంజూరు చేసింది.
కొత్తగా ఆమోదించిన వాటితో కలిపి ఇప్పటివరకు మొత్తం 86 రెసిడెన్షియల్ స్కూల్ కాంప్లెక్స్లకు అనుమతులు లభించాయి. మిగిలిన నియోజకవర్గాల్లో కూడా త్వరగా స్థలాలను సేకరించి, పాఠశాలల నిర్మాణాలను పూర్తి చేయాలని ప్రభుత్వం నిర్ణయించింది.
