స్వాతంత్ర్య దినోత్సవ వేడుకల్లో ప్రధాని మోదీ మాట్లాడుతూ, మావోయిస్టు మనస్తత్వం కలిగిన వ్యక్తులు ప్రభుత్వ వ్యవస్థల్లో పాతుకుపోయారని ఆరోపించారు. వీరు విధాన నిర్ణయాలను ప్రభావితం చేస్తూ దేశానికి ప్రమాదకరంగా మారారని ఆయన హెచ్చరించారు. వీరిని ఉద్దేశించి ఆయన 'దిమాగీ నక్సల్' (మేధోపరమైన నక్సలైట్లు) అనే పదాన్ని ఉపయోగించారు.
ఈ వ్యాఖ్యలపై కాంగ్రెస్ సీనియర్ నేత పి.చిదంబరం సోషల్ మీడియా వేదిక Xలో స్పందించారు. తాను కూడా దిమాగీ నక్సల్ను అయినందుకు గర్వపడుతున్నానని ఆయన పేర్కొన్నారు. దీంతో ఈ అంశంపై అధికార, ప్రతిపక్ష నేతల మధ్య మాటల యుద్ధం మొదలైంది.
చిదంబరం వ్యాఖ్యలపై కేంద్ర మంత్రి కిరణ్ రిజిజు తీవ్రంగా స్పందించారు. ప్రధాని మోదీ ప్రతిపక్ష నేతలను ఉద్దేశించి ఆ వ్యాఖ్యలు చేయలేదని, కేవలం నిర్దిష్ట వర్గాన్ని మాత్రమే అన్నారని ఆయన వివరణ ఇచ్చారు. మాజీ హోంమంత్రి హోదాలో ఉండి చిదంబరం ఇలా మాట్లాడటం దేశానికి నష్టం కలిగిస్తుందని రిజిజు విమర్శించారు.
భారత రాజ్యాంగాన్ని వ్యతిరేకించేవారు, వేర్పాటువాదులకు మద్దతు ఇచ్చేవారు, ఆర్టికల్ 370ని సమర్థించేవారు మరియు ఈశాన్య ప్రాంతాన్ని దేశం నుంచి వేరు చేయాలని చూసేవారిని ఉద్దేశించే ప్రధాని ఆ వ్యాఖ్యలు చేశారని రిజిజు స్పష్టం చేశారు.
