భారతదేశంలో ప్రధాన నదులన్నింటినీ స్త్రీలుగా భావించడం ఆనవాయితీగా వస్తోంది. కానీ, బ్రహ్మపుత్ర నది మాత్రం దీనికి భిన్నంగా పురుష నదిగా గుర్తింపు పొందింది. సంస్కృతంలో బ్రహ్మపుత్ర అంటే బ్రహ్మదేవుని కుమారుడు అని అర్థం. హిందూ పురాణాల ప్రకారం, సృష్టికర్త అయిన బ్రహ్మ దేవుని అంశతో ఈ నది ఉద్భవించిందని నమ్ముతారు.
ఈ నది గంభీరత, అనూహ్యమైన ఉధృతి కారణంగా స్థానిక ప్రజలు దీనికి పురుష లక్షణాలను ఆపాదించారు. సుమారు 2,900 కిలోమీటర్ల పొడవున ప్రవహించే ఈ నదిని, ప్రవహించే ప్రాంతాన్ని బట్టి వేర్వేరు పేర్లతో పిలుస్తారు. టిబెట్లో యార్లుంగ్ త్సాంగ్పో అని, భారత్లోకి ప్రవేశించాక సియాంగ్ లేదా దిహాంగ్ అని, అస్సాం లోయలో బ్రహ్మపుత్ర అని, బంగ్లాదేశ్లో యమున అని పిలుస్తారు.
అస్సాం ప్రజలకు ఈ నది జీవనాడి వంటిది. తాగునీరు, సాగునీరు, చేపల వేట వంటి అవసరాలకు లక్షలాది మంది దీనిపైనే ఆధారపడతారు. ప్రపంచంలోనే అతిపెద్ద నదీ ద్వీపమైన మజులి, ఖాజీరంగా నేషనల్ పార్క్ వంటి అరుదైన ప్రాంతాలు ఈ నదీ పరీవాహక ప్రాంతంలోనే ఉన్నాయి.
పర్యాటకులు గౌహతిలో బోట్ క్రూయిజ్, మజులిలో అస్సామీ సంస్కృతి, దిబ్రూగఢ్లో తేయాకు తోటలను సందర్శించవచ్చు. హిమాలయ పర్వత సౌందర్యాన్ని చూడాలనుకునే వారు అరుణాచల్ ప్రదేశ్లోని సియాంగ్ ప్రాంతాన్ని ఎంచుకోవచ్చు.
