బంగ్లాదేశ్ అధ్యక్షుడు షాబుద్దీన్ తన పదవికి రాజీనామా చేస్తున్నట్లు ఆయన కార్యాలయం శుక్రవారం ప్రకటించింది. తీవ్రమైన ఆరోగ్య సమస్యల కారణంగానే ఈ నిర్ణయం తీసుకున్నట్లు వెల్లడించింది. 76 ఏళ్ల షాబుద్దీన్ ఏప్రిల్ 2023 నుంచి అధ్యక్షుడిగా కొనసాగుతున్నారు.
మాజీ ప్రధాని షేక్ హసీనాకు అత్యంత సన్నిహితుడిగా పేరున్న షాబుద్దీన్, ఆమెతో రహస్యంగా మాట్లాడారనే ఆరోపణలు ఎదుర్కొంటున్నారు. 2024లో విద్యార్థుల ఆధ్వర్యంలో జరిగిన ప్రజా తిరుగుబాటుతో హసీనా ప్రభుత్వం కూలిపోయి, ఆమె భారత్కు పారిపోయినప్పటికీ, షాబుద్దీన్ తన పదవిలో కొనసాగారు. విద్యార్థి ఉద్యమం తర్వాత రాజ్యాంగ పదవిలో కొనసాగిన ఏకైక వ్యక్తి ఆయనే.
ఈ పరిణామంతో షేక్ హసీనాకు అధికార వర్గాల్లో ఉన్న మిత్రులందరూ దూరమైనట్లయింది. హసీనా ప్రభుత్వం పడిపోయినప్పటి నుంచి ఆమెకు చెందిన అవామీ లీగ్ పార్టీపై నిషేధం విధించగా, ఆ పార్టీ నేతలు జైలు పాలవ్వడం లేదా అజ్ఞాతంలోకి వెళ్లడం జరిగింది. డిసెంబర్లో తిరిగి స్వదేశానికి వస్తానని హసీనా ప్రకటించిన నేపథ్యంలో ఈ రాజీనామా ప్రాధాన్యత సంతరించుకుంది.
కొత్త అధ్యక్షుడు ఎన్నికయ్యే వరకు జాతీయ పార్లమెంట్ (జాతీయ సంసద్) స్పీకర్ తాత్కాలిక అధ్యక్షుడిగా వ్యవహరిస్తారు. బంగ్లాదేశ్లో అధ్యక్షుడే సాయుధ దళాల సర్వసైన్యాధ్యక్షుడిగా ఉన్నప్పటికీ, కార్యనిర్వాహక అధికారాలన్నీ ప్రధానమంత్రి, మంత్రి వర్గం చేతిలోనే ఉంటాయి.
