హైదరాబాద్లోని బాలానగర్లో గంజాయిని చిన్న ప్యాకెట్లుగా చేసి విక్రయిస్తున్న కొత్త తరహా డ్రగ్స్ దందాను ఈగల్ ఫోర్స్ (మాదకద్రవ్యాల నిరోధక ప్రత్యేక విభాగం) అధికారులు గుర్తించారు. ఒడిశా నుంచి గంజాయిని తీసుకొచ్చి, ఇంట్లోనే నిల్వ చేసి, ఆపై వాట్సాప్ ద్వారా ఆర్డర్లు తీసుకుని విక్రయాలు జరుపుతున్నట్లు దర్యాప్తులో తేలింది.
ఈ ముఠా గంజాయిని కస్టమర్లకు చేరవేసేందుకు కొరియర్, ర్యాపిడో వంటి డెలివరీ సేవలను వినియోగిస్తోంది. ఫుడ్ ఆర్డర్ చేసినట్లుగానే పేమెంట్, డెలివరీ ప్రక్రియను టెక్నాలజీ సాయంతో పోలీసుల కంట పడకుండా నిందితులు నిర్వహిస్తున్నారు.
తెలంగాణ వ్యాప్తంగా మాదకద్రవ్యాల అక్రమ రవాణా, వినియోగంపై ఈగల్ ఫోర్స్ విస్తృత ఆపరేషన్ చేపట్టింది. ఈ దాడుల్లో భాగంగా ఇప్పటివరకు 69 మంది డ్రగ్ స్మగ్లర్లు, 49 మంది వినియోగదారులను అధికారులు అదుపులోకి తీసుకున్నారు.
హైదరాబాద్ పరిధిలో స్మగ్లర్ల నుంచి వినియోగదారుల వరకు అందరినీ గుర్తించేందుకు అధికారులు చర్యలు కొనసాగిస్తున్నారు. డ్రగ్స్ దందా కొత్త రూపాలు దాల్చుతున్న నేపథ్యంలో, ఈగల్ ఫోర్స్ ఆపరేషన్ కీలకంగా మారింది.
