అమెరికా, రష్యా, చైనాల తర్వాత అత్యంత క్లిష్టమైన ఫుల్-ఫ్లో స్టేజ్డ్ కంబషన్ (FFSC) రాకెట్ ఇంజిన్ సాంకేతికతను భారత్ సాధించింది. బెంగళూరుకు చెందిన ఆస్ట్రోబేస్ స్పేస్ టెక్నాలజీస్ అనే స్టార్టప్ సంస్థ, 'ఎవరెస్ట్' పేరుతో 800 కిలోన్యూటన్ల సామర్థ్యం గల ఈ ఇంజిన్ను తాజాగా ఆవిష్కరించింది.
సాధారణ రాకెట్ ఇంజిన్లలో ఇంధనం లేదా ఆక్సిడైజర్ను మండించిన తర్వాత కొంత భాగం వ్యర్థంగా బయటకు వెళ్తుంది. కానీ, FFSC డిజైన్లో ఇంధనం వృధా కాకుండా రెండు విడివిడి ప్రీ-బర్నర్ల ద్వారా 100 శాతం వాయువులుగా మారి మెయిన్ కంబషన్ ఛాంబర్లోకి ప్రవేశిస్తాయి. దీనివల్ల ఇంజిన్ లోపల 300 బార్ కంటే ఎక్కువ ఒత్తిడి నిరంతరాయంగా ఉండి, రాకెట్కు గరిష్ఠ శక్తిని అందిస్తుంది.
ఈ ఎవరెస్ట్ ఇంజిన్ తయారీలో దేశంలోనే అతిపెద్ద ఇండస్ట్రియల్ 3D ప్రింటర్ను ఉపయోగించారు. లిక్విడ్ ఆక్సిజన్ మరియు లిక్విడ్ మీథేన్ ఇంధనంగా పనిచేసే ఈ ఇంజిన్ను 50 సార్లకు పైగా తిరిగి ఉపయోగించుకునే వెసులుబాటు ఉంది. అలాగే, దీని థ్రస్ట్ను 50 శాతం నుంచి 110 శాతం వరకు మార్చుకోవచ్చు.
ప్రస్తుతం ప్రపంచంలో స్పేస్ఎక్స్ సంస్థకు చెందిన రాప్టర్ ఇంజిన్ మాత్రమే ఈ సాంకేతికతతో విజయవంతంగా పనిచేస్తోంది. ఈ టెక్నాలజీ అందుబాటులోకి రావడంతో భవిష్యత్తులో తక్కువ ఖర్చుతో కూడిన రాకెట్లను భారత్ సొంతంగా తయారు చేసుకునే అవకాశం ఉంది. ఇది అంతరిక్ష వాణిజ్య రంగంలో దేశాన్ని మరింత శక్తివంతంగా మారుస్తుంది.
