తెలంగాణలో రేషన్ కార్డు ఉన్న ప్రతి కుటుంబ సభ్యుడు తప్పనిసరిగా e-KYC ప్రక్రియను పూర్తి చేయాలని పౌర సరఫరాల శాఖ స్పష్టం చేసింది. కార్డులో పేరున్న ప్రతి ఒక్కరూ బయోమెట్రిక్ లేదా ఐరిస్ స్కాన్ ద్వారా తమ వివరాలను ధృవీకరించుకోవాలి. కుటుంబంలో ఒక్కరి వివరాలు నమోదు చేసినంత మాత్రాన సరిపోదని, ప్రతి సభ్యుడి ఆధార్ వివరాలు నమోదు కావడం అవసరమని అధికారులు పేర్కొన్నారు.
ఈ ప్రక్రియ కోసం లబ్ధిదారులు తమ స్థానిక రేషన్ దుకాణాన్ని లేదా సమీపంలోని మీసేవా కేంద్రాన్ని సంప్రదించవచ్చు. వెళ్లేటప్పుడు ఒరిజినల్ రేషన్ కార్డుతో పాటు, కుటుంబంలోని ప్రతి సభ్యుడి ఒరిజినల్ ఆధార్ కార్డులను వెంట తీసుకెళ్లాలి. ఈ సేవ పూర్తిగా ఉచితమని, ఎవరైనా డబ్బులు అడిగితే అధికారులకు ఫిర్యాదు చేయాలని శాఖ సూచించింది.
నిజమైన అర్హులను గుర్తించడం, నకిలీ కార్డులను తొలగించడం మరియు లబ్ధిదారుల వివరాలను నవీకరించడం కోసం ప్రభుత్వం ఈ నిర్ణయం తీసుకుంది. జూలై 31 గడువు ముగిసిన తర్వాత, e-KYC పూర్తి చేయని కుటుంబాలకు రేషన్ పంపిణీతో పాటు ఆహార భద్రతా కార్డు ద్వారా అందే ఇతర సంక్షేమ ప్రయోజనాలు నిలిచిపోయే అవకాశం ఉందని అధికారులు హెచ్చరించారు.
