బ్రిటన్ ప్రభుత్వం ఇరాన్ ఇస్లామిక్ రివల్యూషనరీ గార్డ్ కార్ప్స్ (IRGC)ను ఉగ్రవాద సంస్థగా అధికారికంగా ప్రకటించింది. ఈ నిర్ణయంతో యూకే పరిధిలో ఆ సంస్థకు మద్దతు ఇవ్వడం శిక్షార్హమైన నేరంగా మారింది. దేశ భద్రతకు ముప్పు కలిగించే కార్యకలాపాల్లో IRGC పాలుపంచుకుందని సాక్ష్యాధారాల సమీక్ష తర్వాత యూకే హోం ఆఫీస్ నిర్ధారించింది.
బ్రిటన్ గడ్డపై ఇరాన్ కుట్రలు, భద్రతా ముప్పుల నేపథ్యంలో ఈ కఠిన చర్య తీసుకున్నారు. ఇరాన్ ఇంటర్నేషనల్ టెలివిజన్ జర్నలిస్టులపై హత్యాయత్నాలు, బ్రిటీష్ ప్రయోజనాలను లక్ష్యంగా చేసుకున్న సైబర్ దాడులు జరగడం ఆందోళన కలిగించాయి. జాతీయ ప్రయోజనాలను పరిరక్షించడానికి, పౌరుల భద్రత కోసం ఈ నిషేధం అత్యవసరమని ప్రభుత్వం తెలిపింది.
అదే సమయంలో ఇస్లామిక్ మూవ్మెంట్ ఆఫ్ ది కంపానియన్స్ ఆఫ్ ది రైట్ (IMCR), రష్యన్ ఫెడరేషన్ వాలంటీర్ కార్ప్స్లను కూడా నిషేధిత జాబితాలో చేర్చనున్నారు. బ్రిటన్లోని యూదు లక్ష్యాలపై దాడులతో IMCRకు సంబంధం ఉండగా, రష్యన్ వాలంటీర్ కార్ప్స్ అంతర్జాతీయ గూఢచార నెట్వర్క్లో భాగమని అధికారులు గుర్తించారు. చట్టపరమైన సమీక్ష అనంతరం ఈ సంస్థలు విదేశీ శక్తులతో ముడిపడి ఉన్నాయని హోం ఆఫీస్ స్పష్టం చేసింది.
మరోవైపు ఇరాన్ వార్తాపత్రిక ఒకటి 13 మంది ప్రముఖుల హిట్లిస్ట్ను విడుదల చేసింది. ఈ జాబితాలో అమెరికా, ఐరోపా నేతలతో పాటు యూకే ప్రధాని కీర్ స్టార్మర్ పేరు కూడా ఉండటం అంతర్జాతీయంగా గా మారింది. ఈ పరిణామాలతో ఇరాన్, ఐరోపా దేశాల మధ్య ఉద్రిక్తతలు మరింత పెరిగే అవకాశాలు కనిపిస్తున్నాయి.
