ఢిల్లీలోని ఒక మురికివాడలో నివసించే మహ్మద్ ఇర్ఫాన్ అనే యువకుడు తన యూట్యూబ్ ఛానల్ను ఆదివారం ప్రారంభించారు. సీనియర్ జర్నలిస్ట్ అజిత్ అంజుమ్ సహకారంతో మొదలైన ఈ ఛానల్కు, ఆదివారం సాయంత్రం నుంచి సోమవారం ఉదయం లోపు 70,000 మందికి పైగా సబ్స్క్రైబర్లు చేరారు. ఇంత తక్కువ సమయంలోనే ఇర్ఫాన్ భారీ ఆదరణ పొందడం గమనార్హం.
అయితే, సోమవారం ఉదయం అకస్మాత్తుగా ఇర్ఫాన్ ఛానల్ను యూట్యూబ్ తొలగించింది. 'మెయిన్ ఇర్ఫాన్' పేజీని తెరవడానికి ప్రయత్నించినప్పుడు, గూగుల్ సేవా నిబంధనలను ఉల్లంఘించిన కారణంగా ఖాతాను తొలగించినట్లు సందేశం కనిపిస్తోంది. ఈ చర్యపై యూట్యూబ్ ఇప్పటివరకు ఎటువంటి అధికారిక వివరణ ఇవ్వలేదు.
ఈ పరిణామంపై ఇర్ఫాన్ ఎక్స్ వేదికగా స్పందించారు. తన ఛానల్ కొత్తదని, యూట్యూబ్ మార్గదర్శకాలను తాను నిజాయితీగా పాటించానని ఆయన పేర్కొన్నారు. యూట్యూబ్ ఆటోమేటిక్ వ్యవస్థలో జరిగిన పొరపాటు వల్ల ఈ తొలగింపు జరిగి ఉండవచ్చని భావిస్తున్నట్లు చెబుతూ, తన ఛానల్ను మరోసారి పరిశీలించి పునరుద్ధరించాలని కోరారు.
ఇర్ఫాన్కు మద్దతుగా జర్నలిస్ట్ అజిత్ అంజుమ్తో పాటు పలువురు సోషల్ మీడియా యూజర్లు పోస్టులు చేశారు. ఛానల్ కంటెంట్ నిజమైనదని, సాంకేతిక లోపం వల్లే ఖాతా తొలగింపు జరిగిందని వారు వాదిస్తున్నారు. ఈ సమస్యను సరిచేయాలని యూట్యూబ్ను వారు కోరుతున్నారు.
