1984 మే 23న ఢిల్లీలోని వికాస్పురి ప్రాంతంలో అశోక్ కుమార్ అనే వ్యక్తి హత్యకు గురయ్యాడు. అశోక్ కుమార్ శరీరంపై అనేక కత్తిపోట్లు ఉండటంతో, జనక్పురి పోలీస్ స్టేషన్లో కేసు నమోదైంది. ఈ కేసులో నత్తూ అలియాస్ నథూలాల్ ప్రధాన నిందితుడిగా ఉన్నాడు.
ఈ హత్య జరిగిన సమయంలో నత్తూ తన స్నేహితుడు బభూతి ప్రసాద్తో కలిసి ఉన్నాడు. అప్పట్లో పోలీసులు బభూతి ప్రసాద్ను అరెస్ట్ చేసి, నేరానికి వాడిన కత్తిని కూడా స్వాధీనం చేసుకున్నారు. అయితే, అప్పటి నుంచి నత్తూ పోలీసులకు చిక్కకుండా తప్పించుకుంటూ వచ్చాడు.
చాలా కాలంగా పెండింగ్లో ఉన్న ఈ పాత కేసును పరిష్కరించాలని ఢిల్లీ పోలీసులు నిర్ణయించుకున్నారు. ఇందుకోసం ఒక ప్రత్యేక బృందాన్ని ఏర్పాటు చేసి, పాత కేసు రికార్డులను నెలల తరబడి పరిశీలించారు. సీతాపూర్, హర్దోయి ప్రాంతాల్లో గాలింపు చేపట్టి నిందితుడి ఆచూకీ కోసం ప్రయత్నించారు.
విచారణలో భాగంగా హర్దోయిలోని పాలి ప్రాంతంలో తనిఖీలు చేస్తుండగా, నత్తూ బతికే ఉన్నాడని పోలీసులు గుర్తించారు. అతను అప్పుడప్పుడు తన సొంత ఊరికి వచ్చి వెళ్తున్నట్లు వారికి సమాచారం అందింది. ఆగస్టు 17న నత్తూ పోలికలతో ఉన్న వ్యక్తి గురించి సమాచారం రావడంతో పోలీసులు నిఘా పెంచారు.
మరుసటి రోజైన ఆగస్టు 18న, నత్తూ తన ఊరి నుంచి ఫరూకాబాద్కు వెళ్లేందుకు ప్రయత్నిస్తుండగా పోలీసులు పట్టుకున్నారు. 42 ఏళ్ల సుదీర్ఘ విరామం తర్వాత నిందితుడు చివరకు పోలీసుల అదుపులోకి వచ్చాడు.
