మన్సూరాబాద్లోని ప్రగతినగర్ కమ్యూనిటీ హాల్లో ఆదివారం 1969 ఉద్యమకారుల రాష్ట్రస్థాయి సమావేశం జరిగింది. ఈ సమావేశంలో సంఘం రాష్ట్ర అధ్యక్షుడు చక్రహరి రామరాజు మాట్లాడుతూ, నాటి ఉద్యమంలో పాల్గొన్న వారికి ప్రభుత్వం గుర్తింపు కల్పించాలని కోరారు.
తొలిదశ ఉద్యమ సమయంలో ఎలక్ట్రానిక్ మీడియా లేదని, ప్రింట్ మీడియా కూడా పరిమితంగానే ఉండేదని ఆయన గుర్తుచేశారు. దీంతో 90 శాతం మంది ఉద్యమకారుల వద్ద తమ భాగస్వామ్యానికి సంబంధించిన ఆధారాలు లేవని, జైలుకు వెళ్లిన వారు కూడా ఆధారాల కోసం పోలీసులను అడిగినా ఫలితం లేదని ఆయన వివరించారు.
తెలంగాణ రాష్ట్రం ఏర్పడిన తర్వాత పాత పది జిల్లాల్లో కమిటీలను ఏర్పాటు చేసి, సమాచారం సేకరించి ఉద్యమకారుల జాబితాను ప్రభుత్వానికి, ఉద్యమకారుల గుర్తింపు కమిటీకి అందించామని రామరాజు తెలిపారు. ఉద్యమంలో పాల్గొన్న వారిలో ఇప్పటికే మూడొంతుల మంది మరణించారని, ప్రస్తుతం సుమారు 3 నుంచి 4 వేల మంది మాత్రమే మిగిలి ఉన్నారని ఆయన చెప్పారు.
గుర్తింపు కార్డులతో పాటు, ప్రభుత్వ ఆసుపత్రుల్లో ఉచిత వైద్యం కోసం ఇచ్చే హెల్త్కార్డులను కూడా వీరికి అందించాలని ఆయన డిమాండ్ చేశారు. అంతేకాదు, మరణించిన ఉద్యమకారుల భార్యలను కూడా ఉద్యమకారులుగా గుర్తించాలని ఆయన కోరారు.
ఈ డిమాండ్లపై ప్రభుత్వం స్పందించకపోతే రాష్ట్రవ్యాప్తంగా పోరాటం చేస్తామని, ముఖ్యమంత్రి రేవంత్రెడ్డి ఇంటిని ముట్టడిస్తామని ఆయన హెచ్చరించారు. ఈ కార్యక్రమంలో మాజీ ఎమ్మెల్యే టీ సుదర్శన్రావుతో పాటు సంఘం ప్రధాన కార్యదర్శి మారం సంతోష్రెడ్డి, కోశాధికారి చంద్రారెడ్డి మరియు వివిధ జిల్లాల ప్రతినిధులు పాల్గొన్నారు.
