ఖమ్మంలోని తన నివాసంలో జరిగిన ఈ సమావేశంలో పువ్వాడ అజయ్కుమార్ మాట్లాడుతూ, ప్రతిపక్షంలో ఉన్నప్పుడు పార్టీ కోసం కష్టపడిన కార్యకర్తలకు ఇకపై ప్రాధాన్యత ఉంటుందని తెలిపారు. అధికారం ఉన్నప్పుడు వచ్చే వారి కంటే, కష్టకాలంలో గులాబీ జెండా మోసిన వారికే పదవులు దక్కుతాయని ఆయన పేర్కొన్నారు.
ప్రస్తుతం ఖమ్మంలో కొనసాగుతున్న ఎస్ఐఆర్ (SIR) ప్రక్రియలో బీఆర్ఎస్ మద్దతుదారుల ఓట్లు తొలగించబడకుండా బూత్ స్థాయి ఏజెంట్లు (BLA) అప్రమత్తంగా ఉండాలని ఆయన సూచించారు. అర్హులైన ప్రతి ఓటరు పేరు జాబితాలో ఉండేలా చూడటంతో పాటు, గత కేసీఆర్ ప్రభుత్వ హయాంలో జరిగిన అభివృద్ధి, సంక్షేమ కార్యక్రమాలను ప్రజల్లోకి తీసుకెళ్లాలని కోరారు.
యువత, మహిళలు, విద్యార్థులు పార్టీ కార్యక్రమాల్లో చురుగ్గా పాల్గొనాలని, సోషల్ మీడియా ద్వారా కాంగ్రెస్ ప్రభుత్వ వైఫల్యాలను ఎండగట్టాలని ఆయన దిశానిర్దేశం చేశారు. పార్టీ సభ్యత్వ నమోదును ఉద్యమస్ఫూర్తితో చేపట్టి ప్రతి కుటుంబాన్ని అనుసంధానం చేయాలని పిలుపునిచ్చారు.
సభ్యత్వ నమోదులో అలసత్వం వహిస్తే కఠినంగా ఉంటానని హెచ్చరించిన పువ్వాడ, అదే సమయంలో అందరినీ అక్కున చేర్చుకుంటానని భరోసా ఇచ్చారు. ఇకపై ప్రతి వారం సమీక్ష నిర్వహించి పురోగతిని స్వయంగా పరిశీలిస్తానని ఆయన స్పష్టం చేశారు.
